Biersupp ut Mäkelborg — Ein duwwelt Geneiten

vun Hannelore Hinz


Man kann dat Bier in Mäkelborg
mal drinken un mal äten.
Wi laden all' tau Biersupp in,
de ward ji nich vergäten!

Un nu? Nu geiht dat los!

Ein Liter Mälk frisch, stripp, strapp, strull,
de löttst du furts upkaken.
Twei Läpel Mähl, man nich tau dull,
de mößt du nu ran maken.

Un nu? Nu heit dat Prost!

Ein Buddel Bier, de drink man ut,
un wierer sast du weiten.
Du halst söß Buddels Bier noch rut,
de in de Mälk ringeiten.

Un nu? Nu kümmt de Rest!

Lütt bäten Zucker möt noch ran,
vier Ei-gäl nich vergäten.
Nu stah bi't Rühren dien'n Mann,
denn kannst bald Biersupp äten.

Un nu? Nu kümmt dat Best!

So'n Biersupp läpelt fein sick ut.
Dau nu dien Frünn' ranwinken.
Langt Biersupp noch nich för dien Snut,
kannst tau de Supp Bier drinken.

Man kann dat Bier in Mäkelborg
mal äten un mal drinken.

Kiek an. Na, denn Prost!


22.3.2009


na baven