Cents to'n Gebortsdag

vun Heinz Tiekötter


Dat vörrut: Legg in en lütten bestickten Büdel, in en scheunet Glas orrer in en smucke Schachtel för jedet Lebensjohr vun dat Gebortsdagskind een Cent. De sünd ut Kupper un ünnerscheedlich blank un wiest uns, dat en Leben ok nich jümmers op Hoochglanz löppt.

Mien lebet Gebortsdagskind,
sünnerlich an son scheune Dogen
mutt een ook'n por ernste Wöör anslogen.
Diene Johrn, de sünd dat weert,
dat wi di hüüt recht ornlich ehrt.
Un so steekt wi nu mit grote Lust
di düsse Doler in de Fuust.

Se sünd nich soveel weert as Eddelsteen
un nich vun Gold un Elfenbeen
Nee, wi hebbt lang söcht för vele Stunnen
bit dat wi düsse Münten funnen.
Un jeed vun düsse Exemploren
steiht hier för een vun diene Johren.

Un kiekst du hen, so markst du licht,
dat nienich een den annern glicht.
Dor gifft dat nämlich männichmol 'n Stück,
dat blinkt un strohlt vun luder Glück.
Un dat steiht denn för so'n Johr,
in dat man richtig glücklich wor.

Un mittenmang gifft dat denn doch
son bannig düster Münten noch.
De tüügt vun de Johrn, man heurt't nich geern,
de seker nich de besten weern.
Man, dat hett jo wull in jeedeen Leben
mol Licht, mol Düsterheiten geben.

Nu heur doch mol so ganz privoot
vun uns en goodgemeenten Root:
Treck di mol mit düt gode Stück
in diene Komer still torüch.
Dor mookst du denn alleen so ganz
mol Inventuur un treckst Bilanz.
Dien Saldo ward jo denn wull geben:
Rundüm weer't doch en scheunet Leben!

Wi koomt to Enn un seggt ganz offen,
loot uns nu op de Tokunft hoffen.
Wi wünscht di lang noch veel Pläsier
un dat wi düssen Hümpel hier
mit veele Münten köönt verlängern.
Vun düsse Münten harr'n wi geern,
dat se so blank sünd as de Steern.

Un so wünscht wi di ok no dien Fest
vun Harten blots dat Allerbest!


9.10.2016


na baven