Juli

vun Brigitte Fokuhl

Nu is't sowiet, wat hebbt wi töövt!
De Urlaubstied kümmt ranne...
Bi Kassel up de Autobahn
hebbt wi de eerste Panne.

Un wekke düüst na Florida,
de annern na Malente,
een jeder na sien' egen Smack
(wi kriegt ja gode Rente).

Man männigeen hett't nich so dick
un bliwwt up sien' Terrassen.
He laad't sik nette Nawers in
un bald roopt s' "Hoch de Tassen!"

De Ostsee laad't to'n Baden in,
dat heet, wenn dat nich regent
un't Weder uns nich hängen lött
un fründlich uns begegent.