Hexendanz to'n eersten Mai

vun Billa Frerich


 

Hexen, swingt sik op den Bessen!
Sett den Kurs na'n Blocksbarg to!
Danz, Musik, Delikatessen
töövt op jede Hexenfro!
Wüllt de Fööt nich sporen
un na'n Blocksbarg fohren!

Danzt, danzt, Hexen, danzt!
Töverhaften Larm
maakt de Vigelinenkranz;
Süster, giff dien Arm!
Hak mi ünner, sluut de Reegn!
O wat schöön is't, Hex to ween!

Op geiht nu de Avendsteern
vun de eerste Nacht in'n Mai.
O wat sünd wi Hexen geern
hier tohopen mit Juchhei!
Fiert, Hexensüstern,
welig, wild un lüstern!

Danzt, danzt, Hexen, danzt!
Danzt den Hexenbann!
Denn in unsen Hexenkranz
düllt wi kenen Mann!
Hak mi ünner, sluut de Reegn!
O wat schöön is't, Hex to ween!

Wiest sik etwa Dokter Fausten,
Satan orrer Goethen hier,
wiest sik: De sünd nich de Schlausten,
denn hüüt gellt: Die töten wir!
Hüüt drippt ja uns Bann
jeden Keerl orr Mann!

Danzt, danzt, Hexen, danzt!
All uns Leev is Freid!
Heevt dat Glas in'n Steernenglanz!
Hooch de Hexenheit!
Hak mi ünner, sluut de Reegn!
O wat schöön is't, Hex to ween!

 
30.4.2017


na baven