Nevelmaand — November

vun Heinz Großmann


Güstern noch de roden Appels
lücht in 'n güllen Sünnenschien,
vör de Huuswand an 't Gelänner
hangt de sworen Druven Wien.

Un in Goorn achter de Astern
Kürbis groot un drall un bunt
deit us Fülle, Segen, Leven
elkeen Johr von Nee'n kund.

Vondaag nu Storm huult dör de Bööm,
ritt af de geel'n un roden Bläder.
De Külle kruppt dör Holt un Feld
mit Regenschuur un Ahnewedder.

Un Nevel suugt sacht all de Farv
ut Böhm un Strüker, Planten, Blomen.
So gries un mööd liggt nu dat Land,
Frost, Ies un Snee schall bald woll kamen.

De Nevelmaand, de gries November,
is för de Welt een lütten Dood.

Doch nich dat Enn, wiel dör dat Starven
warrt nee dat Leven wedder groot.


9.11.2014


na baven