Woans krieg ik Adobe Reader?
Dat Programm Adobe Reader is för Privaatlüüd totaal gratis un kann an vele Steden in't Internet rünnerladen warrn. Faken finnt Se dat ok op CDs, de bi Computerbläder bileggt sünd.
Wi hebbt hier en Hyperlink inricht, 'neem Se direktemang na de Internetsiet vun de Firma Adobe kaamt, de dat Programm maakt hett. Dat is de blage Knoop Download in'n linken Frame (in't Rode). Dar köönt Se den Adobe Reader downloaden.
Wenn Se sik mit Downloads noch nich so utkennt, lest Se sik dat hier man erstmaal sinnig dör, ehrdat Se op den Knoop klickt.
Un so geiht dat:
Se klickt op dat blaag ünnerlegte Woort Download in den roden Frame links. Dat maakt en nieges Fenster apen un geiht denn na de Websiet http://www.adobe.de/products/acrobat/readstep2.html — en Siet vun de Firma Adobe. Dat is de Steed, 'neem Se den Adobe Reader rünnerladen köönt. Düsse Ünnerwiesen blifft dorbi avers apen. — Se köönt natüürlich ok vun Hand na de Adress gahn.
Baven steiht "Schritt 1 vun 2". Na dat klingt doch good. Kiekt Se sik nu eerstmaal de Utwahl-Feller an. Hier köönt Se'n paar persöönliche Saken instelln. Toeerst maal mutt de richtige Spraak för dat Programm utsöcht ween. Dat gifft nämlich vun'n Adobe Reader Utgaven in vele Spraken. Man noch nich op Platt. Düütsch (also Hoochdüütsch) is al instellt. Wüllt Se en anner Spraak, denn klickt Se op den lüttjen swatten Piel rechts blangen dat Woort "Deutsch" un wählt de Spraak ut. Süss laat Se dat Feld in Roh.
Nu gaht Se wieder na de List Platform. Dar schullt Se unbedingt de korrekte Verschoon vun SeEhr Bedreevssystem indregen!
Tipp: Wat heff ik denn?!
Wenn Se sik dor nich kloor över sünd, wat Se för'n Bedreevssystem hebbt, denn kiekt Se man kort na: Menü Start | Arbeitsplatz orr Start | Systemsteuerung opropen, denn dat Fraagteken-Menü ? opmaken un Info wählen. Nu seht Se SeEhr Windows-Verschoon. Süh! Dorna köönt Se de Systeemstüerung orr den Arbeitsplatz glieks wedder tomaken.
In dat Feld Verbindungsgeschwindigkeit mööt Se instelln, wat Se mit en slichte DFÜ-Verbinnung över'n Analoogmodem surfen doot orr wat Se mit en Breitband-Verbinnung (mehrst DSL) ünnerwegens sünd. De Sinn dorvun is düt: Wenn Se Breitband wählt, kriggt se glieks dat "vulle Programm" anbaden, also de Vullverschoon vun Adobe Reader, un de is opstunns ca. 29 MB groot (rode Krink in't Bild).
Wenn Se bi de Verbindungsgeschwindigkeit DFÜ instellt, denn beed Se Adobe an, bloots en afspeckte Verschoon ("Basisversion") vun ca. 14 MB rünnertoladen (rode Krink in't Bild), dat Se sik nich toschannen laadt bi de langsame Verbinnung. Dat is ok vernünftig so. An de Vullverschoon köönt Se mehrst lichter över en Zeitschriften-CD rankamen. — Man wenn Se partu wüllt, köönt Se ok de Vullverschoon vun 29 MB rünnerladen. Denn mööt Se in den lütten Kassen, de in't Bild gröön inkullert is, en Hoken setten.
Tipp: Zeitschriften-CD?
Mennig Computerzeitschriften hebbt CDs un faken ok al DVDs dorbi, op de aktuelle Software (mehrst in Testverschoonen) un ok veel Schnickschnack praat staht. Testverschoonen gifft dat natüürlich bloots vun Software, de süss Geld kosten deit. Avers vun Programme, de ümsüss sünd, gifft dat op Zeitschriften-CDs mehrst ok de Vullversionen! Normalerwies findt Se op so en CD de aktuellen Verschoonen vun alle gängigen Browser (Websiedenbekiekprogrammen) un ok den Adobe Reader. Kiekt Se mal gründli an'n Kiosk na, wat dat op de CD or op de Zeitschrift op steiht.
Den Adobe Reader gifft dat ok mit alle Produkte, bi de en Dokumentaschoon in't PDF-Formaat biliggt. Wenn Se t.B. en Scanner köfft, is op de CD dorto mehrst dat Handbook in't PDF-Formaat — un denn ok de Adobe Reader dorto, dat Se dat lesen köönt. Man Vörsicht: Dor kannst ni seker ween, dat dat de aktuelle Verschoon is!Dormit is de Beriek "Schritt 1" trecht. In "Schritt 2" hebbt Se al to sehn kregen, wa groot de Datei is; nu köönt Se noch bestimmen, wat Se bavento dat Adobe Photoshop Album hebben wullt. Dat is en Warktüüch to'n Bearbeiten un Katalogiseern vun Biller un hett eentlich gor nix mit den Adobe Reader to doon; Se bruukt dat also nich rünnerladen. Klickt Se den Hoken dorvör weg. Dordör warrt de Download ok beten wat lütter.
Bavento kriggt Se villicht noch de "Adobe-Yahoo-Werkzeugleiste" anbaden — noch so'n "Goodie", dat een nich brukt. Den Hoken köönt Se ok löschen.
Vör de Opschoon "Adobe Download Manager nicht verwenden" sett Se op jeden Fall keen Hoken! De "Download Manager" vun Adobe överwacht nämli den Download un is heel nüttlich dorbi.
Nu gaht Se bet ganz na nerrn op de Siet. Dor finnt Se en Link na'n Lizenzverdrag för dat Programm. Den köönt Se lesen, wenn Se op klickt. Man as Privaatnütter maakt Se sowiso mehrst nix verkehrt. Se köönt ok glieks op den Knoop fortsetzen klicken.
Nu geiht dat endlich richtig los! Hier bestellt Se ganz konkret den Download. Klickt Se dorto op den roden Knoop Download.
