Angelus militans — De Stried-Engel

vun Rudi Witzke


Maal regeert Angelus militans hier, denn dor.

Wenn een denkt, in dat Twüschenriek twüschen Heven un Ierd wöör dat still un fredvull togahn orrer allens musing still sien, denn irrt sik de.

De "angeli belli", de Engel, de Kriegsstänkerer sünd, geevt keen Rauh. Ehr Boss, de Düvel, hissst se jümmer wedder gegen de Fredensengel. Jümmer wedder pieren se de Fredensengel. De wehrt sik ornlich, avers meist helpt dat för korte Tiet. — So vertellt sik dat unse Olen. So is dat binah en Wunner, dat wi an 75 Johr Freden hebbt.

Aver: Jüst is de Keilerie mit Libyen beten wat beder, dor fangt se in Syrien wedder an — un jedein Macht ümrüm maakt mit, as Geier üm en Aas. Millionen Minschen lopen in Afrika vör dat scheiten Volk un de brennen Sünn weg — un mit jüm de Fredens- un Kriegsengel, de Hunger un de Noot. In Afghanistan sit de Taliban in ehr Bargen un töövt, dat de Fredensbringer wedder na Huus hen verswinnen un se bestimmen köönt, wokeen dat Seggen hett. Ahn Scheiterie ward dat wedder nich afgahn. Un de Fruuns kriegt wiss nich miehr Rechte, ehrder en grötter Dauk.

Een Eck wieder up uns Ierd schient de Sünn vun Heven hendal. Villicht is dat dat Tohuus vun de Sünnenengel? Nich doch! Hier gifft dat Flüchtlinge, de över dat Wader hen na uns willt. Woso, dat hett uns so nau nich interesseert. Se dröömt vun Eten un Drinken. Se kaamt vun Somalia, Libyen, Syrien, Sudan, Ägypten, Äthopien oder Eritrea.

Bloots vun ehr Scheep kaamt nich jümmer all an in Lampedusa an. Vele Boots-Flüchtlinge kriegt wi, un vele Versopene behöllt de See. Dat is hier in Südeuropa de Kriegs-un Fredens-Reken.

Överall gifft dat in frieen Westen Institute, de utforschen schallt, woso de Minschen nich Freden maken köönt, hålen köönt. Woso se sik jümmer ümbringen mütt. Dat dischkereert se in Talkrunden, schrievt Dokterarbeiden, dorbi ok beten af.

Jümmer wedder duken in de vergahn Tieden Machtgierige up. Dat weit se al. Un se köönt allens verklåren, wo, woso un worüm. So klauke Psychoinstitute hebbt wi. Wenn dat Huus brennt, köönt se uns seggen, wo dat Füür utbraken is. Se harrn letzt Füüer-Meller anmonteert.


Franz von Stuck, Utsnitt ut "Inferno"

Un dat anner Institut vun een Geheemdeinst kriggt rut, wat för niege Apprate se för't Ümbringen utprobeert. Een Super-Drohn villicht, de unsichtboor is? All pfriemelt an wat rüm, aver nüms will dat west sien.

Denn wenn wat nich klappt, denn ward en düüre Utschuss grünnt, de rutfinnen schall, wat de Minister för dat Verdeffenderen vör Dingsdag Klock drei dat to weiten kregen hett orrer na Klock drei, dat de Drohnen bloots links fleigen köönt un jüst up de linke Siet höhnerblind sünd... Wenn hei orrer sei sien/ehr Amt dat nich up de Minuut weit, denn so is hei/se een Löögner orrer se hebbt sik besteken laten. Se brukten letzt nich betahlen, as se in den Chines'schen Circus weern. Hei orrer se, all mütt weg, aver foorts. Wo kaamt wi hen, wenn een in een Restaurant sik dat Eten betahlen lött? — Dor höögt sik Luzifer.

För welk weer so en Teiken dat Teiken för en beder Taukunft, för de mehrsten en Teiken vun Mörders. Wo sünd de gauden Engel?


Luzifer (1890), Franz von Stuck

"Jümmer de Grövelie över nieges Bööses! Een mucht doch ok maal eien un straken!" Bloots Leges-Daun maakt ok nich tofreden, nich mal Luzifer. Een mutt aver jümmer wieder maken. Luzifer is to un to hochnäsig. Dissen Kriegsengel geiht aver de Luft ut.

Nu snack nich miehr üm den hitten Brie rüm. Segg schon: För wat steiht Lucifer? Wat hett hei so Leges anstellt? — Hei steiht för de Dootsünnen! Un hier is de Liste vun de söven Dootsünnen:

  1. Stolt
  2. Giez
  3. Nied
  4. Dullheit
  5. Wolllust, Unkeuschheit
  6. Völlerie, Freterie, Maatlosigkeit, Sülvstsucht
  7. Fuulheit.

Welk Dootsünnen kunnen wi afwennen? Vele wiss nich. Dor hebbt de Böveren wiss beide Ogen taumaakt.

75 Johr Freden!
Avers bloots bi uns.

Luzifer ward ut den Heven jagt. Un dat Licht geiht wedder ut.


Bild 1, 2 un 3: Paul Klee
Bild 10: Mihály Zichy

12.1.2020


na baven