Dat kannst mi glööven!
Internet — vandaag un fröher

vun Pastor Johann Christophers, Ilten


To'n Anhören hier klicken:


Lesen deit Johann Christophers.


Dat junge Bruutpaar sitt bi mi in d' Amtsstuuv. Wi proten ganz munter mit'nanner. Tüskenin mutten wi düchtig lachen. Un so fraag ik denn: "Wor hebbt ji beid jo denn dat eerste Mal sehn?" Se smüstern. "Wi beid hebben uns in d' Internet kennenlernt." Ik segg: "Dat kummt vandaag ja faker mal för, dat junge Lüüd van'nanner dat eerste Maal in d' Internet höörn." De beid vertellen mi denn, dat se anfangs een heelen Urlaub lang WhatsApp-Nahrichten uttuscht hebben. "Un denn hebben wi beid uns dat eerste Mal sehn."

So löppt dat vandaag nich selten: in Internet up'nanner stöten, sük mit Worden taxeren, Fotos stüürn un sük eerst Weken later real gegenöverstaan.
Vandaag löppt dat so. Bloot vandaag?

Mi falln een Mann un een Frau in: de hebbt sük vör bold fiefhunnert Johr kennenleernt. Katharina von Bora un Martin Luther. Se weer een Nonn un he een Mönch, un beide haren mit dat olle Läben ofslotten.
Katharina harr bi de Maler Lucas Cranach Unnerschlupf funnen; man se harr noch kien Kerl. Un Martin Luther? De wuss nich so recht, wat he wull.


"Herr Käthe", maalt vun Cranach

Lucas Cranach un sien Fro, de hebben denn dorför sörgt, dat de beide sük kennenlernen dän. Se hebben sotoseggen Internet spöölt. Un se hebben woll Martin Luther düchtig tosett, sük doch endlich för de Katharina to entscheden. Un so is dat denn ok angahn. Un mit de Tied harrn de beid sük so richtig leev. Sess Kinner sünd dor upstahn. Martin Luther weer düchtig stolt up sien Käthe. Un dat kunn he ok wesen. Sien Herrin Katharina — so proot he van sien Fro — harr een Veehtucht; broo Beer; kümmer sük um de Studenten un anner Lüüd, de bi de Luthers wohnen dän un weer van mörgens bit abends up d' Been.

Noch vandaag fiert man in Wittenberg in d' Juni de Hochtied van Katharina un Martin Luther as een groode Fest.

Bi mien Bruutpaar in de Amtsstuuv geböhr dat so: An d' Enn van uns Gespreck tusken wi uns Mail-Adressen ut. So sünd wi mitnanner vernett. Denn — viellicht gifft dat ja bold een Dööp ...


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


15.1.2017


na baven