As Fru Priewitzer in den Dacksbuu fullen is

vun Günter Weber


Maandag weer dat. Ik weer in'e Sauna weest. Dat weer noch so 10 Minuten bit Klock acht. Ik kiek in dat Kiekschapp. In'n NDR vertellt se vun en lütt Dörp bi uns up de Eck. Ik kiek un ik kiek noch måål. Rohrsoll harrn se Friedag utloost. Und dor weern sei nu dat Wekenenn mit de Kamera hen na Rohrsoll. — Rohrsoll! Ölven Johr bün ik dor Dag in un Dag ut vörbi, üm na de Schaul tau kamen. Ierst na Golchen, Rohrsoll vörbi, denn na de Kreisstadt Ollentreptow.

Een Familie leevt dor man noch. Domaals weern dat 90 Minschen, seggte de Minsch, de dor nu noch wahnt. Alles verfallen un verlaten.


Ool Hus. Bild: Anthonij von Borsson

Vun een ool Huus will ik vertellen. Dat lütte Buurnhuus, dat en lütt Enn weg vun Rohrsoll stünn, aver tau Rohrsoll tauhören dää, dat nömten sei "Vullscheten Emmer". Woso? Ik weit dat nich. In dat domaals al ole Huus weern Flüchtlinge vun Böhmen inwiest worrn.
Priewitzer heiten sei. Hei weer Snieder, hett Büxen flickt, aver ok niege Anzüge maakt.
Achter dat ole Hus stünn in'e Strüker so en ole Pump.

Sei, de "Ool Priewitsch", weer beten wat unheimlich. Krüderhex weer se, se hett Hannen upleggt un "bepüstert". Sei hett ok heimlich "bötet".


Alarmhurn. Foto Memecry/Wikimedia Commons

Ünnen an den lütten Barg in Klempenow harr Rudolf Krempkow graad en Friewillig Füerwehr opstellt. Wenn hei de Füerwehr alarmierte, denn leep hei mit so'n Tuut op un daal. Hei trötete düchtig. Kunnst dat wiet hürn. Hei wier ja de Sireen.
Ik weit hüüt noch genau. Dat weer Sünndagvörmeddag. De Kark weer ut. Kaldruweit keem mit eiß un Rudolf mit de Tuut. Wat is los? Fru Priewitzer is weg.

Sunnavendmeddag weer sei weg und nu an Sünndag noch nich wedder dor.
De Wehren ut Burow un Golchen sünd ok alarmiert worren.


Dörppump na dat Foto vun Thomas Kohler/Wikimedia commons

De Sökerie güng los. Da güng so bit Sünndagavend. Een vun de Füerwehrminschen harr sich wunnert, dat achter de ool Pump de Dacks mit twee Jungen en Gang ünner de olen Afdeckbreed harr, de na sienen Buu güng. De Dacksbuu weer in de olen, nu drögen Brunnen. Fru Priewitzer weer dörch de morsche Holtafdeckung in den Brunnen stört.

De Dacks mit sien Jungen is afhaugt. Sei sülven kunn nich so luud raupen, dat dat de ole Schnieder Priewitzer hürte. Aver se hebbt se funnen. Sei is denn ruutholt worrn. Se harr sik nix braken, kold weer ehr, un Hunger un Dööst harr se.

Uns Pastor Beyer hett neegsten Sünndag in'e Kark noch seggt, uns Herrgott hett Fru Priewitzer funnen. De weer seker dorbi. De kaputte Brunnenafdeckung aver hett Walter Krempkow, de Söhn vun den Klempenower Brandmeister, tauierst seihn.


De Dacks weer ok nich begeistert vun de Geschicht!
Bild Guido Hammer/Wikimedia Commons

De Geschicht müßten se up alle Fäll de Lüüd vun't Kiekschapp vertellen. Aver de willn ja lopen Biller ut de niegste Tiet maken. Un stahn Biller gifft dat vun de Pump un den Brunnen ok nich. Un Fru Priewitz kunn nix miehr vertellen. Överhaupt weer dat nu to laat. De Snacker un Kameralüüd vun den NDR weern all wedder woanners ünnerwegens.

För ole Belevnisse, ole Geschichten, Beschrieven vun ole Saken hebbt wi aver jümmer noch uns plattdüütsch Spraak!


23.9.2014


na baven