Den Verfater sien Original Hamborger Polizeitschako. De Roos woor in'n Deenst nich dragen. Klick op to'n Vergröttern! — Foto: Feldhusen

 

En Udel ut Hamborg vertellt:
Teddyboor un greune Mapp

vun Gerd Feldhusen


De greune Mapp

In miene Tiet as Zivilfahnder harrn wi so en olen VW-Käfer mit Seilzugbremse. Dormols kunnen wi de Verkehrssünner direktemang to'n Verkehrsünnerricht vörloden.

In ene greune Mapp harrn wi all de wichtigen Ünnerlogen.

An een Dag holen wi 'n Autofohrer an un ick legg bi de Schrieberee miene Mapp op uns' Autodack. As wi ferdig sünd, fohrn wi wedder los. Ick kiek op den Rüchsitt, dor liggt ene greune Mapp. Nu muttst du weeten, mien leeven Leser, dat mien Kolleeg un ick de sülbigen greunen Mappen harrn.

Nu kannst du di vörstellen, wat passeert. Richtig: Ick heff miene Mapp op dat Autodack liggen loten. De is bi dat Wiederfohrn natüürlich rünnerfulln. No ene lüttje Tied kiek ick noch mol no achtern. Dor liggt blots eene (!) Mapp. Un dat is de Mapp vun mienen Kollegen. — Wat nu? Erst nochmol seuken — oder glieks an de Deenststell' fohrn un... beichten?

Wi sünd rinfohrt. De Wachhobende froogt: "Naaa, alles klar?" Ick heff noch nich den Moot, em dat Malöör mit de greune Mapp to beichten. He froogt noch mol: "Wirklich alles klar? Ich habe nämlich einen Anruf von einem Bürger bekommen, der eine grüne Mappe gefunden hat."
Dor is dat ruut!

So gau heff ick noch nienich telefoneert un den Finder ook glieks froogt, ov he Zigarren oder Zigaretten smeukt. He smeukt Zigarren. Un de Marke hett he mi ook glieks seggt.

Dat is mi eene Kist Zigarrn weert. Ick suus los. De ehrliche Finder un ick, wi smeuken tosomen jeder eene vun de Zigarrn. De Himmel is nich runnerfulln. De Welt is wedder in Ordnung.


Dat ole Koortenspeel un de "Aktion Teddybär"

Ick harr in miene Sturm- un Drangtiet mol wedder wat sammelt. Düttmol is dat eene groode Speeltüchsammlung för all de Hamburger Kinnergoorns. Nöömt heff ik dat "Aktion Teddybär". Dorbi kummt so veel tosomen, ick kann dat kuum noch stauen. Toletzt hebbt wi de Soken in dree (!) Hörsools bi de Fachschool för Sozialpädagogik in de Max-Brauer-Allee opstopelt. Wi köönt all de Kinnergordens in Hamborg und Umgebung mit Speeltüch versorgen.

Bi düsse Sammelee passeern veele lüttje Geschichten. An eene Geschicht erinner ick mi besünners geern. Miene Deenststell wöör de Verkehrsstaffel West in de Bodenstedtstroot in Altona. Dorhen keem en olen Mann, leggt en afgreepen Koortenspeel op den Wachruum-Tresen un seggt to mi: "Mien Jung, dütt Koortenspeel hett mi veel Glück brocht. Ick schenk di dat, dormit du ook noch veel Glück hest un veel Glück verschenken kannst mit diene Akschoon Teddybär."

He geiht wedder rut ...un ick heff eenen Kluten in mienen Hals.


Foto Pastor Reetz: Nissen
25.5.2014


na baven