Pommersche Gaus mit Placken. Mööt Gäus eentlich jümmer arrogant kieken? — Foto Ewig Lender/Wikimedia Commons

De Gaus

vun Günter Weber


De Gaus is'n klauken Vagel, seggt de Buer, singen kann se nich, awerst se denkt sik ehr Deil.

Damals in Meckelbörg hett jedeen en Gaus hatt, so männicheen vun de Buern ok woll twintig Stück. Natürlich ok Ganters dorbi. Dat kann ik di seggen, die wiern ganz schön frech. Ganz besunners wenn se Gössels harrn.

So vör föfftig Joahr hett de Bundsminister mi hierher an den Rhein schickt. Feine Wohnung. Praktisch en eigen Huus. Dienst ümmer in de frie Natur. Streifenwagen vör de Döör. Instiegen un du weerst up de Arbeit. De Umgebung in de Diaspora. Dat nehmen sei hier ok noch ernst. De Katholen un wi poor Evangelen dor tüschen. Dat Platt von'n Niederrhein! 10 Joahr heff ik liehrt. Dor kunn ik't verstahn, spreken un schrieven. Ja, ik heff hier ok veel op Platt in de grote "Rheinische Post" schreven.

So af Mitte Januar begünnen se hier — un daun dat hüüt noch —, Gauseier tau koken un tau eten. Uns Oma schall sik woll in't Graff umdreihen, wenn sei dat seihn harr.

In dat lütte Dörp in Vorpommern legte een Gaus 15 bit 20 Gauseier, Anfang Februar ünner de Gaus, de ja ümmer mit den Ganter west ist. Dei Eier weern befrucht. So na 14 Dagen kunnst dat ok schon seihn. Na 28 Dagen hett dei Gaus so 15 bit 17 lütte Gössel ünner sik. Dat weer ja bannig koolt.

Denn aver greep dei Minsch in. Dei Gössel kemen dei iersten Nächten in enen olen Karton, den met ole Tiedings utleggt weer. Boven dröver ne olle Russendeck vun de Suldaten un denn an den Kökenherd. Die Gaus bleev in den Stall. Sei söchte de ganze Nacht ehr Kinner. Dei schlummerten friedlich in de Köök un fiepten vör sik hen.


Lütt Gössel kann noch nich lesen un sitt al mang Zeitungen! Foto Weber

Dagsöver kemen sei ok na buten. Dei Gaus hett nie so veel Platz ünner sik hat, üm alle tau bedecken. Wat hebbt de doch de iersten Daag för fein Freten kreegen! Ik müsste de ganz fiene Brennettel seuken. Fein hackt, wöör de mit hart kokte Eier mengeliert. So veel Eier heff ik nie nich tau Oostern kregen.

Na twei Weken kemen de lütten Gössel to de olle Gaus in den Stall.

Ik müßt denn dei Gäus häuden, ierst inne Wischen, dorna op dei Stoppelfeller. Dei Selbstbinder schneden dat Korn so kort af, dat de Stoppeln man bloß so piekten. Wintergassen keem op denn Kornböhn, un dat Gassenschroot wöör tau Nudeln maakt.

De Ganters kemen in den engen Stall un wörren mit de Nudeln vun dat Gassenschroot faudert. Dat weer twors verboden, doch nüms juckte dat. Een Week dörften sei denn noch op denn Dörpdiek, dormit dei Feddern schön sauber wöörn. De fienen Feddern sünd inne Bedden kamen. Wat weer dat schön, in dat kole Vorpommern avends unner dat Fedderbett tau krupen!


Gäus warrn plückt. Foto Rieger, gaensevater.de

Later in'n Harvst güng dat de Gäus an'n Kragen. Bi dat Schlachten geev dat Swattsuur met Wickelpooten. Braden Gausfleich in de grooten Weckgläser weer in'n Winter lecker. Af un tau krieg ik dat hüüt noch bi dei Verwandtschaft in Vorpommern.

Denn müsst ik bi dei Spickgans — gerökerte Gausbrust — helpen.
Dat schiere Fleisch vun dei Gausbost hett so 3-4 Dagen solten un peppert in Düstern legen. Denn wöör dat tausammenleggt un ganz dull verschnürt.


Hmmmmm..... Foto Weber

So sehg dat ut, wenn Oma sei vier Weeken ganz sacht met Säägspöön von'ne Bäuk rökert hett. De Säägspöön heff ik extra ümmer vun dat Saagwark ut Burow halen müßt.

Bi denn Schlachter in Warin kost dat Kilo verleden Joahr 38 Euro. Wenn uns Kinner Oostern wedder all bi uns sünd, gifft dat meddags Tafelspitz un to't Abendbrot dat Weitenbrot von Oma sülfst backt, mit Gausbost. — Ik freug ni nu al.


22.5.2016


na baven