Dat Hubertuswunner: Dei (latere) Hillige süht den Hirsch mit'n Kruzifix up'n Kopp

Hubertus von Lüttich (655-727) wür as Bischoff von Maastricht un Lüttich nå sienen Dod hillig språken un dat, wat von em bläben wier, wür an'n 3. November 743 as „Reliquie“ utmåkt un keem denn in't Johr 825 nå St. Hubert inne Ardennen, wo's denn nå dei Franzöösch Revolutschon von 1789 verschwunnen is.

Nich verschwunnen is dat Andenken an den Hilligen Hubertus. Von em ward vertellt, dat hei eins jagen güng un em dorbi 'n Hirsch mit 'n Kruzfix mank dei Hüürns inne Moet keem. Ut dissen Grund gellt hei as Schutzpatron vonne Jagd un dei Hunn un von all, dei wat mit Jagen, Scheiten un Schlachten von wille Dierten tau daun hemm'. Un wenn Allerheiligen an 1. November dei Gedenkdach för alle Hilligen is , so hett dei Hillig Hubertus sienen Gedenkdach an'n 3. November, Dei wür ok nå dei Reformatschon vonne evangel'sch-lutherischen Christen œwernåhmen un hei wiederhen mit dat Kruzifix mank dei Hirschstangen afbillt. Em tau Ihren gifft dat Hubertusborgen. -brunnen -karken, -messen un noch anner Brukdaum. So sall Solt, Brot un Wader, dat an'n Hubertusdach sägent ward, gägen Tollwut un böse Hunn' schützen.

Jäger un Jagdgemeinschaften blåsen taun Hubertusjagd mit Jagdhuurnblasen un all dat Brukdaum, wat för 'n Weidmann schicklich is. „Hubertusjagd“ heit 'n Stummfilm von 1911, 'n Heimatfilm von 1959 un 'n TV-Film von 1985, dei "Plattfööt" besingen 1992 dei „Hubertusjagd“.

Hubertus tau Ihren ward Kirch afhollen, männigmål sogor ökumenisch, also kathoolsch un evangel'sch vermengeliert. Näben dei Jagd nå ollen Bruk mit Jägers un Driewers up Schwattkittel, Schålenwild un villicht Vöss gifft dat grote Hubertusjagden, wo mihr dat Rieden as dat Jagen von Bedüdung is. Un wecker nich rieden will orrer kann, dei kann por Stunnen Hubertusjagd in'n Kutsch un an'n Abend noch 'n Riederball beläben. Hubertusjagd is hier un dor dat grote Volksfest, wo denn dei Rieder taun Enn' noch taun Vergnäugen von dei välen Besäuker un Taukieker den ünnern Strohballen verstäkten „Voss“ finnen moeten un dei Voss-Stiert sowat as 'n Wannerpokal is. Bi disse Oort von Hubertusjagd hett 'n Schwattkittel orrer Hirsch nix mihr tau säuken. Dat is dat reine Vergnäugen för Riederslüüd un Sportvereine, man kümmt tausamen, ritt ut, deit äten, drinken un vertellen...

An'n Hubertusdach ward hüt so un so an den Hilligen Hubertus in Mäkelnborg dacht, dat gifft un geef Messen, taun Bispill mit Jagdhuurnbläser inne Marienkark von Usedom, in St. Marien tau Gripswold un inne Kark tau Redefin. Dat gifft dei Hubertsjagden von Piersportleiwhawers up Riederhööf, dat gifft würkliche Hubertusjachten mit 'n Scheitiesen up Schwattkittel un Co. un dat gifft Hubertusvossjagden mit 'n Hubertusmenüh as Beläwnisgastronomie för Lüüd, dei gägen Küll giern 'n Lodenmantel œwerschmieten. Harsttiet is äben ok Hubertustiet!