De Kees-Deif

vun Günter Weber


Ach Gott, wi sünd ja so modern. Ok noch in unsern Öller! In mien nie Benzinschees is allens PC-stüürt. Wennt se wat taurecht maken willt, denn geiht dat ran an de Diagnosebox. Stecker rin. Dat summt, un rut kümmt en Zeddel, wo de dat In-Tweie updruckt is.

Denn denk ik trüch: Beginn vun de föftiger Johr...

Genau so eenen LKW, as up dat Foto, keem jeden Dunnersdag namiddags denn langen Barg in Klempenow na Ollentreptow hoch. Dat weer dunnemals de Bäderstraße 96. Vun Dag is sei dat ok noch. Nu heit se aver Bundesstraße 96. Besünners in'n August is mi dat in Erinnerung. Dicht an die groote Straat harr Gorner Wilhelm Stark een groote Plantaasch mit Suurkirschen.

Ik müßt oppassen, dat de Spreien nich alle Kirschen fräten. Ik seet dor mit een groote Ploogschoor. Ik kloppte gegen un dat schepperte.

Denn keem dat Holtgasauto vun de Käserie ut Ollentreptow. Beter seggt, dat föhr van Jarmen na Ollentreptow. Vun wiet weer dat to hören. Dat jaulte so. Vör allen Dingen: dat keem bloot gaaanz langsam den Barg hoch. Dor wakten wi op. "Jüdel, jüdel, jüddel, jüüdel!" sää dat olle Holtgasauto mit de Keeskisten achter op. Mit veer Jungens huschten wi ut de Strüker. Rupp op dat Auto! Poor Kisten echten Harzer Stinkerkäs na jede Siet rünnerschmeeten. Denn gau af! De Fohrer harr uns seihn. Hei kunn aver dat Holtgasauto an den Barg nich anhollenen. Hei kreeg dat denn nich wedder in Gang! De Kätel müßt ierst nie inbööt warden.

Dat ging een poor Johr gaut. Jümmer kreeg hei de Bengels nich tau faten. Hei führte denn later öwer Tutow, Demmin na Ollentreptow. Op denn Weg weer keen Barg, wo dat Holtgasauto nich hochkeem.

Den Kees wöör verdeilt. Unsern Grootvadder stellte denn Kees ümmer in den Åben. Manchmal leep de Kees ok all uteenanner op den Töller. Wokeen harr domaals al en Käuhlschapp?

Kees wöör noch lang föhrt. Denn aver mit een Horch 3 A, een mit twee Fohrers.

Un Dieselmotoren! Un för de weern uns Bargen keen Probleem!


28.6.2009


na baven