De Etymologie

vun Wolfhard Sauerbrey


Kennst du dat: Etymologie?
Dat heet: dor pult se uns mit bi,
mit so ne heel Speziaal-Method,
woher de Wöör denn kamen doot.
So stickt in't Woord "Verdeffendeern"
latiensch defendere as Keern,
curare is de Stamm för "Kur"
un vun dat murus kümmt uns "Muur".
Nu wull ik avers ok maal weten,
wat schull denn egens "Labskaus" heten?!

För mennigeen is düsse "Labe"
nu würklich nich 'n Gottesgabe:
Kantüffeln, Hering, Rode Bete,
de warrt gemixt in düsse Knete,

een Spegelei is ok dorbi
in düssen snaakschen Küsten-Brie —
kortüm — veel Lüd, de hebbt dor schon
so'n lierlütte Aversion.
Un "Labskaus" — wull ik maal erwähnen —
geiht ok för Minschen ohne Tähnen:
de köönt dat Tüüg ok ohne Kauen
di restlos ahn Problem verdauen!

Villicht, dat ji'n Matrosen kennt,
de ju vun't Woord den Ursprung nennt?
Ik sülvst, ik heff in mennich Stunnen
in keeneen Lexikon wat funnen!
Dat deit mi leed un argert mi:
Hier streikt de Etymologie!


Bild 1: Harrieta171/Wikimedia Commons
21.10.2018


na baven