Eisenach, Eisleben, Wittenbarg un ümto

vun Wolfhard Sauerbrey


Bin jüst op Luther-Reise wesen,
wull all de Saken sehn un lesen,
de een nu doch noch weten schall:
Fiefhunnert Johr sünd dat nu al,
un jümmers kümmt wat Nieget to,
wat ik betto nich kennen do.
Mi intresseeren grad dree Lüüd,
de'n meist tohoop op Biller süht:
Melanchthon, Luther, Bugenhagen.
To Luther hebbt wi ja keen Fragen,
de Zeitungen sünd dorvun vull,
un Böker gifft dat jüst as dull,
dor kann een sik heel licht un geern
wo een ok hingrippt, informeern.


To Luther is allens seggt — oder?

Nu Bugenhagen: düssen Mann,
den keek ik mi wat neger an,
den Mann, de Martin un sien Brut
in Wittenbarg malins harr truut;
de grote Bibeldeelen hett
för uns in Plattdütsch översett;
de Luthers Dodenpredigt heel —
ja, Bugenhagen gull dor veel.


Johannes Bugenhagen

He höör to düsse grote Runn
vun Wetenschoppers, de sik funn,
de sik dagdäglich hebbt bemött
un swore Texten översett.
Dat spunn sik dor in'n groten Bogen:
Latiensch un Greeksche Philologen,
un Jöödsche för den olen Deel
vun't Testament — weern bannig veel!

Do höört denn ok Melanchthon bi,
weer ok so'n grotet Spraakgenie.


Philipp Melanchthon

Vun düssen Mann warrt nu bericht't
een blied un sünnerbor Geschicht,
de jüst bi em besünners wunnert —
he, Humanist vun düt Johrhunnert …!
Na, sien Frünn Luther harr al freet
sien Katharina, as'n weet;
nu kunn an düsse Freerie
Melanchthon ok nich recht vörbi.
He kriggt'n Fru, un jedeen denkt,
dat de nu still sien Leven lenkt —
un würklich süht dat ut för jeden,
her weer mit ehr so recht tofreden.
Man denn, een's Daags, da weer dat ut,
do keem he mit de Wohrheit rut,
do fröög em een unschüllig dat:
"Un mit dien Fru, wo geiht di dat?"
Melanchthon man — un dat is wahr —
"Sie stört mich!" sä he lapidar.
Mehr kreeg een, dään sien Frünnen swören,
vun siene Ehe nix to hören.


Harr sien Eh en Knacks
orr bloot Melanchthon sülven?

Dat wiest uns mol wedder: ok de Groten Geister sünd nich anners as unsereen!


30.4.2017

 


na baven