Logo "Wunnerwarken in Mäkelborg"Wunnerwarken in Mäkelborg, Deel 8:
Barge un Türms in Mäkelborg-Vörpommern

vun H. Jürgen Grebin



Künn man in Mäkelborg eigentlich von Bargen spräken? Süll man datt nich leiwer bi Anhöhn orrer Hümpel (Hügel) laten? Disse Fraach is för einen Barchlänner bestimmt ganz sülvstverständlich, wenn hei bi uns inn Nuurden dei Landschaft dörchstriept un inne Rägel ein wiet Sicht geneiten kann.

Von Hiddensee bit na de Insel Moen sünd dat ca. 50 km. Bi besünners gode Sicht kannst von'n Dornbusch dei Steilküst von dei Insel Moen sehn
Von Hiddensee bit na de Insel Moen sünd dat ca. 50 km. Bi besünners gode Sicht kannst von'n Dornbusch dei Steilküst von dei Insel Moen sehn

Doch — in denn Oogenblick, wenn wi Flachlänner up einen von dei Barge, Kuppen, Hümpels orrer Hügels stahn un wiet in't Land orrer up uns Ostsee seihn, is dei Anter up dei Fraach klaar. Ook wi hebbn Barge — äben uns Barge — as denn bekannten Leuchtturm up denn Bastorfer Barch mit siene 79 m, in dei Kühlung westlich von Rostock. Wer kann as wi so en Sicht, öwer dat affallend Land öwer Kühlungsborn wech, bit wiet up dei Ostsee un dorbi mit alle Sinnen dei Höch öwer denn Meeresspeigel erläbn!

Lüüchtturm up Hiddensee
Lüüchtturm up Hiddensee

Ook dei Hohe Schönberg inn Kreis Nuurdwestmäkelborg mit sien 90 m giwwt denn Besäuker ein Beläwnis von dat Tausaamendrapen von Land, Meer un werrer Land — nämlich dei Landschaft von'n Klützer Winkel, dei Ostsee, genauer dei Lübecker Bucht, un up dei anner Siet Schleswig-Holstein (Wagrien).

Bargen in Holsteen un Mäkelborg
Bargen in Holsteen un Mäkelborg

Up dei Insel Rügen koenen wi herrliche Rundblicke von'n Uutsichtssturm von't Jachtschloss Granitz (69,3 m) un nich tau vergäten inne Stubnitz von'n "legendären" Königstauhl mit 117 m up dei Ostsee erläben. Ook von'n Ernst-Moritz-Arndt-Turm up denn Rugard bi Bergen koenen wi up' t Waarer seihn; tworsten is dat nich dei Ostsee, oewer ein Deil von ehr, näämlich dei Jasmunner Bodden.

Blick vun't Oberland up Hiddensee
Blick vun't Oberland up Hiddensee


Brunnen up Burg Schlitz. Klick up tau'n Vergröttern!

Up den Kückelsberg bi Benz, Insel Usedom, mit sien blots 58 m is ein uutteikend schöne Rundümsicht moeglich.

Blots dei Blick vonn 72 m hoogen Duurnbusch up dei Insel Hiddensee bi kloorer un koll' Luft up dei 40 km wieden Krei´felsen von dei dänisch Insel Moen oewerdröppt allns, wat sick Flachlänner as Fiernsicht dröömen laten koenen.

Gegend vun dei Mäkelborgsche Schwiez
Gegend vun dei Mäkelborgsche Schwiez

Ein bargich-hüglich Land is Mäkelborg, besonners in'n Beriek von'ne Seenplatt, un sei schmückt sick in'ne Mier von Mäkelborg sogor mit denn Tausatz "Mäkelborgsche Schweiz". Dei Schweiz hebbn wi al siet Tieden von Hans Graf von Schlitz (1763-1831) up Burch Schlitz. Hier giwwt datt immerhin Höch von 99 Meter (un 121 m) oewer denn Meeresspeigel — ganz schön hoch för uns Land!

Hier is ein Fiernsicht in dat bekannte Malchiner Becken, von denn boomlosen und turmlosen Röthelbarch in'ne Parkanlaach von Burg Schlitz mit sien 96 Meter, ganz schön anseihnlich.

Slott Ulrichshusen
Slott Ulrichshusen

Ook dei Rostocker hebbn ehre "Rostocker Schweiz" mit dei Freundschafthöch (Kaiserbarch) von 66 m oewer denn Meeresspeigel bi denn Uurt Kösterbeck. In'n Vergleik dortau dei Höch von Rostock (Neuer Markt) mit 14 m — dei is nich siehr hoch.

In einen Bidrach von ein' Tageszeitung von'n 31. Juli 2002 wüürd disse "sanfte" Hügel allerdings bäten oewerdräben. In Anspälung up dei hoogen Barch inne 832 km wiede Schweiz ward hei as ein von dei "höchsten Erhebungen" nüürdlich vun Berlin beteikend, woll blots üm dei besonnere Laach von'ne "Mäkelborgsche Schweiz" ruttostrieken. Dorbi hett dei Schriewer vör Begeisterung oewer ganz dei annern groten Bargen vergäten.

Blick in dei Mäkelborgische Schwiez
Blick in dei Mäkelborgische Schwiez

Awseihn von ein högere Erhäbung up einen bäten westlicher lägenen Längenkries, dei Ruhner Barch mit 176,5 m tweithöchst Barch von Mäkelborg, moet man denn wierer östlich lägenen Helpter Berg mit 179 m as denn höchsten Barch Mäkelborgs, un ook nüürdlich von Berlin lägen, doch woll noch vör denn Röthelberg rangieren laten. Uuterdem — na dei Wenn 1989/1990 koent wi Flachlänner beruhicht denn in Schleswig-Holstein — in't Gemeindgebiet Schönwalde, Holsteinsche Schweiz, lägenen Bungsbarch mit 168 m dortauräken, dei Iserbarch bi Grevesmühlen mit 100 m is ook noch hööger. Bi disse Gelägenheit wüll wi blots mal so erwähnen, dat man von denn Iserbarch oewer denn ganzen Klützer Winkel un binah bitt na Sleswig-Holsteen kieken kann — natürlich blots bi schön Wäärer!

Brunnenfigur in Schorsow
Brunnenfigur in Schorsow

Ein besonners schöne Hügelgrupp is dei von Mönchsgut in'n Südosten von Rügen. Wenn man hier up dei nich so hoogen Hügel bi Thiessow steiht, kann man oewer denn Griepswolder Bodden kieken un dei 4 groten Blöcke von dat frühere DDR-Atomkraftwerk seihn.

Bi disse Erwähnung woelen wi mal so bilöpich dörchblicken laten, dat wi in Mäkelborg sogor in dei Barch noch einen See inschlaaten koenen — denn mit 108 m höchst lägen Schwarzen See (2,11 ha groot un 2 m deip) bi Schlemmin in'n Nuurden von Düütschland. Dat is doch woll watt Besonneres un mööt unbedingt künnig maakt warrn.

Tau'n Schluss willn wi noch so näbenbi seggen, dat wi ook ein poor hooge Türms hebbn. Dat sünd nich vääl, doch vergäten dörpen wi dei nich.

Dei Helpterbarch in dei Helpter Berge südöstlich von Neubrandenburg (Niegen Brambörch) wiest tworst einen Turm up, allerdings keinen Uutsicksturm, sünnern einen Fiernseihturm. Dei kann wägen sien Höch bestaunt warrn, för dei Uutsicht in't Land jedoch leider nich brukt warrn.

Bi Schlemmin steiht ein mennig von uns Mäkelbörgern bekannte Fiernseihturm — früher noch mit ein Gaststätt verbunnen, dei leider verswunnen is.

Einziger T 34 in Ostdeutschland (Lalendorf )
Einziger T 34 in Ostdeutschland (Lalendorf )

Ook dei Schmooksberg (127 m nuurdöstlich von Güstrow) hett einen Turm, allerdings is dat ne militärisch Radaranlaach, dei wiethin tau seihn, aver nich dörch Besäukers tau bruken is. Ook up denn Iserbarch bi Grevsmöhlen stahn twei Turms, leider ook blots Fiernseihturms. Dei lüttere 42 m hooge Stahlgittermast wüür bit 1990 von'n Straatendienst as Funkturm brukt. Mit denn tweiten, 78 m hoogen Sendeturm begünn dei Telekom 1994 mit dat Infodern von Satellitenprogrammen in dat niege Kabelnetz von Grevesmöhlen. Doch von hier kann man von einen "Hümpel", dei noch intüünt is, wiet in denn Klützer Winkel un in't Land seihn.

Sülwst dei Jörnberg in Krakow am See mit sein 71 m Seehöch ward dörch einen 31-Meter-Turm hööger maakt, as hei is — von em kann man ein schönen Uutblick oewer dei Seenlandschaft bät tau dei Autobahn bi Linstow geneiten.

Blick in dei Mäkelborgische Schwiez
Blick in dei Mäkelborgische Schwiez mit Eekboom

In'n Slottpark vun Schorsow. Klick up tau'n Vergröttern!
In'n Slottpark vun Schorsow. Klick up tau'n Vergröttern!

Noch wierer riekt dei Blick von den nieg buuchten 32 m hoogen Uutsichstturm in dei Ruhner Barchs (176,6 m hoch) wiet rin dei dei Bunnslänner Mäkelborg-Vörpommern un Brandenburch.

Dei ward mit sienen Turm ümmerhen noch von denn 35 Meter hoogen Turm in Basedow in dei Näh von'n Malchiner See oewerdraapen. Sien Fiernsicht riekt oewer nich an dei von sien "Bräuder" in' Lann ran.

As östlichste Punkt von Düütschland in dei aapen Ostsee gellt dei Greifswalder Oie. Von hier hett man einen einmaligen Blick von denn Leuchtturm (38,6 m) bit na de Südostspitz von Rügen roewer. Dei Leuchtturm is dei lichtstarkste mit dei einzig linksdreihende Optik an dei ganze düütsche Ostseeküst.

Tau'n Schluss wüllen wi ut Heimatverbunnenheit denn Rostocker Fiernseihturm nömen. In vergahn Tieden künn man em sogor noch bestiegen un bi gaud Wärer bit Gedser seihn, also in ein anner Land kieken. Wer kann dat wohl von sick seggen?


Lüüchtturm up Hiddensee


Fotos: H.-J. Grebin
Översicht över de Bidrääg
8.2.2009


na baven