De Pierzwiesterer

vun Günter Weber

Bi'n Hoofsmitt. Bild vun Ferdinand Waldmüller

Dachdäglich sühst in dat TV-Schapp wat vun Wunnerheiler. Dat sünd bloots wat annere Deertentöver sünd. Ja, ok bi de Deerten is dat hüüt niemoodsch.
De Knåkenbräker vun Freesland, de jümmer sik scheif lacht, is bekannt.
As ik dat so seh, denn is dat för mi nix Nieges. Besünners wat de Pier angeiht. In uns Smeed geev dat dat ok all Anfang vun de föfftiger Johr.

Ingang tau dat Stalag Fünfeichen, Niebrandenburg

Unsen Meister sien Vader weerr so'n rechten Pierschauster. Wenn bi en Pierd nix miehr güng, dennso keem Richard, unsen Altmeister. Richard harr bi de Russen ok veel uthollen müßt. Hei wier in Niebrandenburg-Fiefhausen in dat berüchtigte Lager. Hei sää nienich veel. Hei is nienich en Nazi west.

Sükes Pierd mit Koppermuul. Bild Andizo/Wikimedia Commons

Dat is nu nich miehr unsen olen Pierdschauster Richard. So mööt man sich dat vörstellen, wenn Richard mit dat Pierd snackte, denn summte hei.

Ik heff jümmer giern mit em tausamen arbeidt , vör allen ümmer in'n Sommer bi de Aust un in'n Harvst bi't Tüffelnracken. Ik wier ok de, de die meiste Murr in de Knåken harr. Hei meinte: "Du bist so stukig, di kann man en Rung (Wagendeil vun'n Leiterwagen) in Nors afbreken." Ik heff ok faken avends de twei Käuh strippt. Kreeg ik wat Melk un af un tau en half Pund Bodder.

Richard weer also denn de Pierzwiesterer, wenn denn ollen Schmidtke mit sien Stuut "Heila" keem. Hei harr ok innen Summer de Pelzmütz up.

Vörn un achtern güng Heila hooch, wenn sei de Smää bloot seihn hett. De Gaul von den olen Schmidtke stunn ok noch beten scheif op sien Been. Meisting Max, de Söhn vun den Pierflüsterer, wüßt dat genau. Die niegen Haufiesen wörren för Heila all trecht leegt.

Maak du maal de olen Haufiesen af, wenn dat Pierd ni still steiht. In'n Beschlagstall steiht dat Pierd. De Uhren na achtern. Dörch de Neeslöcker is dat an' t Püüstern.

Hoofsmitt. Bild Alex_brollo/Wikimedia Commons

Nu kümmt unsen Altmeister Richard an dat Pierd. Hei snackt mit em, in de Lederschört en Oberlippenbremse. So utrüst güng Meister Richard vun vörn an Heila ran. Hei snackt natürlick bloots Platt mit dat Pierd. De Horchlöpel güngen hooch. Uns Pierdswiesterer mit de Füürtang een Ohr lütt beten inklemmt un lies an singen. Jå, Richard, uns Altmeister, summte ganz sacht dat Pierd wat vör.

Denn ollen Schmidtke, "ein geflichteter Landwirt aus Ostpreißen", sä jümmer, "Wirde ich das nicht selbst erleben, es wirde mir ja keiner jlauben."

Bild Alex_brollo/Wikimedia Commons

Hei künn Heila dat linke achtere Been anbören. Ik heff dat ole Haufiesen afmaakt. Mit achtern links füng een ümmer mit de niegen Iesen an, wenn en Pierd an alle veer Bein nieg Haufiesen kreeg. Ik halte dat ole Horn vun den Hauf, sneed denn Strahl rut. Meister Max keem mit dat gläunig Haufiesen. Ok de Rook regte dat Pierd nich miehr op. An den Kopp stund unsen Pierflüsterer Altmeister Richard. Ik glööv vundach noch, dat hei manchmal ok ganz lies summt hett "Wo die Ostseewellen trekken an den Strand..."

Bild Gutis1979/Wikimedia Commons

Veer funkelnagelniege Haufiesen kosteten dunnemals 16 Mark. Schmidtke betahlte ja ümmer in bar. "Ich kann ja starven!", meinte hei jedes Mal, "und dann bekommst du nuscht nich."

Wi Liehrlings, natürlich bloots de, de mit beslaan harrn, kreegen ümmer 1 DDR-Mark. Dat weeren teihn Zigaretten vun de Marke "Turf" orrer twee Eierlikör in den Schokoladenbecher för de Danzdaam bi'n negsten Danz in Breest in den Kraug vun Witt.

So ganz nie is dat mit den "Pierflüsterer" also nich.