Wiehnachten an Boord  

vun Hans-Hermann Briese

Teihn Mielen vör de Küst. Biskaya was naar ruug. Man nu de See as en Spegel. Un dat an de veeruntwintigste Dezember. An Land de Lüchten van Vigo. Porto vörut. Klaar de Nacht. Sülvern Steerns an de Heven. Spegeln sük up dat Water.
Hillih Avend in See.

Kuntainerschipp van Bremerhaven na Casablanca. Kuntainerstapel. Van de extra hoge Brügg haast neet over wegtokieken. De Kaptein an dat Roor. Mütz in de Nack. Radaarfeld in 't Vermick. Lüchtfinger tekent dat Küstenband.

Düüts de Kaptein. Düüts ok de Nummer Een, de Maschienmann. Düüts de Schippsjung. Sien eerste Reis. Hett de Schippfahrtsschool in Leer achter sük. De eerste Dreih. Muss instiegen. Muss fahren, jüst over Wiehnachten.

Leev sünd se tegen hum, de beid Düütse un de acht Filippinos. Seelüü. Vandaag besünners. Hillig Avend. Laten hum en bietje gewähren. Laten hum tofree. Laten hum en Settje an de Reling stahn. Laten hum drömen. Laten hum en paar Tranen reren.

De Smuut stappt ut de Kombüüs. Emmer mit Etensresten. De güttjet he over Boord. Bült Salöaatbladen. Sücht de Jung daar stahn. Geiht hen un striekelt hum over 't Haar. Mutt sük daarbi up de Tonen stellen, de lüttje Keerl hett en Handdook um de Liev slaan. Is heel neet dick, de Smuut. Lacht ut sien dunker Ogen, de lüttje Mann.

Over Boordluudspreker nu heel sacht en Wiehnachtsleed. Van de Dannenboom mit de gröne Bladen. De neet blot in Sömmertied grönen deit, nee, ok in Winter, wenn dat sneeit. Man wied un siet van Sneei keen Spoor.

Dat lett de Jung as en Gröten van tohuus. He föhlt sük an de Hand nomen. De Filippinos hebben all schone blaue Overalls an. Halen hum daar van de Reling. Führen hum sacht na de Kajüüt hen. Stöten de Döör open. Schuven hum in de Kamer.

Daar steiht en lüttje Dannenboom up de Tafel. Heel van Bremerhaven mitbrocht. Verstoken in dat Kabelgatt. Steiht un lücht mit sess Kersen. Lücht spegelt sük in sülvsrn Kugels. Dannenboom mit Kersen. Ha, wat för en Göör. Is Kerstied. Is Wiehnacht.

Geschenken unner de Dannenboom. Mooi inpackt för de Jung. Zuckerlaa. En Daagbook. Sowat van de eerste Reis up de Decksel. Ut de Luudspreker nu van stille Nacht, hillige Nacht.

Daarna Alarm. Exercise! All hands on deck! Öven! Öven! Füür in Achterschipp! Alarm!