 |
|
Gedenken an de Pamir — Beden op See Andacht vun Henning Eggers |
|
Wi wüllt hüüt in disse Andacht erinnern an den dramatischen Ünnergang vun dat Seilschipp Pamir vun de Flying-P-Liner vun de Reederie F. Laeisz. De Katastrooph hett sik jüst nu in'n Harvst vör 60 Johr in'n Noord-Atlantik todragen. 80 mehrst junge Seelüüd bleven doot. Wie bün ik dorop koomen? Nich bloots dör den runden Johrsdag. Uns Familie Eggers speelt hier en Rull mit. De Familie harr sik in de Johrhunnerte deelt in den Ditmarscher un den Oolenwerder Twieg. Un de Kaptein Hermann Eggers ut uns Familienverband wär de vörletzt Kommodore op de S.S. Pamir. Uns Familie stammt alltohoop ut Ditmarschen un wärn jümmers Seelüüd west. Kaptein Eggers möös op de letzt Reis vun de Pamir in't Krankenhuus un so käm denn Kaptein Johannes Diebitsch as Kommodore an Bord. De Pamir föhr vun Hamborg an 1. Juni 1957 ünner Ballast na Buenos Aires, dor nehm man 3.780 Tonnen Garste an Bord. An 11. August 1957 güng dat wedder över den Atlantik torüch in Richtung Hamborg.
Kaptein Diebitsch wär en erfahrn Seilschipp-Kaptein mit Patent vun 1925. De Ünnergang wöör dörch den Hurrikan "Carrie" an'n 21. September 1957 verursacht. Bloots fief Seemaaten wöörn as dörch en Wunner rett. Dat Lübecker Seeamt hett woll Recht snackt, avers dat woll ok en beten verklausuleert; man wunnert sik, denn dat Süsterschipp, de S.S. Passat, harr Ähnliches dörmaakt, aver se kunn sik afsetten un en Noothaben anlopen. Nu is in de Kark St. Jakobi in Lübeck en Gedenksteed, direkt gegenöver vun de "Lübecker Schippergesellschap". Över dat Beeden in de Seefohrt hebbt wi all wat hört, uns Gott is jümmer dorbi, wenn't op Seereis geiht! Wenn en Schipp buut ward, denn ward en Prester inlaadt, he mutt sien Segen geben, denn dat Schipp schall jümmer good över den Ozean seiln. In de Hansetied nehmen de Kooplüüd Mönche mit op de Fohrt, de wärn kloog un kunnen as Dolmetscher in de Fremde fungeern — un dat Beeden op de Reis mit de Seelüüd mooken! 1956 bün ik ok to See fohrt, as Maschinenassi op de M.S. Solveig Rickertsen, dat wär en 4-Luken-Schipp mit 2 Hauptmaschin' un 2 Propeller. De Solveig wär buut worn 1929 in Haugesund (Norwegen), de Rumpf wär noch komplett niet, as dat fröher mookt wöör — ok bi de Pamir. De Hamborger Fruchtimporteur Rickertsen harr sik 3 Scheep köfft un sik as Erzimporteur verdingt bi Graengelsberger in Schweden. De Fohrten güngen jümmer vun dat Festland na Narvik un wedder torüch. Ik bün in Emden insteegen un de eersten Reisen wärn alle glatt gohn. In November — wi harrn dat Iisenerz in Narvik laadt bit an de Lagemarke un nu schull dat na Antwerpen gahn. Kennt ji de Äquinoktien? Dat sünd de Orkane in't Fröhjohr un ok in Harvst, de över de Ozeane störmt. Nu, uns Schipp weer in de Höchde vun Kap Svienö bi Bergen, dor güng dat los! Orkan mit Stärke 12 un mehr, jümmer vun Südwest uns entgegen mit Wellenbarge vun 15 bit 20 Meter Hööchde. Uns Solveig stüüer mit halve Kraft vörut dorgegen, un liekers fohrn wi 3 Meilen trüchwarts! Dat Water lööp över dat ganze Schipp un slöög över de Skylights. Hebbt ji mol een Schipp schreen hört? Di kann Angst un Bang warrn! Un de Arbeid in de 12/4-Wachen güng liekers wieder! Ik heff luuthals beedt to uns Gott mit den Lütten Kathechismus vun Martin Luther in'ne Hann. Ok en Bild vun miene Leevste Lischen hüng över miene Koje; ik heff mi inreed: "Mien Deern, heff keen Bang, Gott is bi mi un ik kumm wedder heel na di!" Allens güng jo ok good; aver in Antwerpen bünn ik in de Groot Kathedrale gahn un heff vör den Altar en lang Dankgebeed beed! So bün ik bit to de Rente jümmer mit Scheep op Werften in Verbinnung west; mien letzt Schipp wär de Norrönna, buut bi Flender Lübeck 2002/03; de fohrt noch jümmer vun Dänemark över Norwegen na de Färöer-Inseln. — Uns Schicksol hett uns Gott in siene Hannen! Bangnis un Vertruuen Gott is bi di. Wees man nich bang!
|
||||
|
3.10.2017 |
||||
