Dat kannst mi glööven!
Ick hebb jau ein Bispill gäben!

vun Peter Kossen

To'n Anhören hier klicken:

Lesen deit Peter Kossen.

Dorothea is bold 58 Jaohre olt. Sei brukt jümmers frömde Hülpe un fäuert in 'n Rullstauhl. Malheurs un Käälte un 40 Operationen hett se all beläwt. Un wat forten upfallt: Dorothea is meist gaut taufräe. "Eigentlich bün ick heel dankbaor. Miene Melessen hebbt mi dichter tau Gott brochd." Lüe wunnert sick, wenn se dat so segg.

Mit säben Jaohrn was et 'n Autounfall, dei dat Läben van nu up glieks veännert hett. Dorothea fünd trügge in 't Läben un inne Schaule. Dat Kind was klauk un kööm gaut taurechte, uck up 't Gymnaosium. Nich aale Lehrpersonen wullen dat mitdrägen, un van "Inklusion" schnackde noch nümms. So bleew dei Sonderschaule un löter dei Warkstäe för Behinnerte. Dei Aorbeit maokt ehr Spaoß, segg Dorothea, un sei hett dor Fraide un Frönde. Noch 'n Unfall, Krankenhuus, Käälte… — Man Maut, Fraide un Dankborkeit sünd Dorothea nich misse gaohn. Schrieben un Maolen sünd Gawen, wecke dei Herrgott ehr besünners riek gäwen hett. Disse Gawen beholt Dorothea nich för sick. Väle Frönde, Bekannte un uck Unbekannte frait sick äöwer ehre Wöör un Biller.

In eine Zeitung hett Dorothea köttens dat "Vaterunser" veklaort. Dat fang so an: "Use Vaoder: Schull us dat heel leip gaohn: Operationen, Gefängnis…, wi köänt un dröäwt di at "Vaoder" anschnacken. Du seggst: Aowerall, wor ick bün, dor is dei Himmel. Dorüm dröäwt un möät ji jau dat heel schön maoken hier up d' Eern, dat 'n Deel van 'n Himmel hier all jaue is…" Dorothea schriff van 'n Himmel up Eern — un dat lett man sick säggen van ehr.

Leiwe Tauhörers, dei Evangelist Johannes vetellt: Jesus waschket siene Frönden dei Fäute, ehrder sei dat lessde Aobendmaohl tauhope fiert. "Ick hebb jau ein Bispill gäben!", segg Jesus. Gott bört sick so deip, dat dei Mensk grot herut kump. Grot un lütket, Himmel un Eern, behinnert un nich-behinnert — Jesus reuhert et aal gau dör'nänner! Riek is, wecke Gott's Leiwde beläwt un dorför blied un dankbor is, wecke Fraide hett un Fraide gäben mag.

Bi eine Anspraoke tau ein Benefiz-Konzert hett Dorothea seggt: "Kiek, ick bruk nicks Besünners köänen. Et is einfach genaug, dat ick dor bün. Dat gelt för jedeneinen. Dorüm segg ick uck di: Gott hett di leiw. Et is genaug, dat du dor büss." Wat Dorothea segg, dat tüügt van Gröttde, un et maokt Mensken grot. "Ick hebb jau ein Bispill gäben", so hör ick Jesus sägen…

Bi us up plattpartu.de finnt man nu utsöchte Bidräge van disse Radiosendung.