Dat kannst mi glööven!
Radiergummi för't Läwen

vun Diakon Hubert Looschen, Garrel

To'n Anhören hier klicken:

Lesen deit Hubert Looschen.

Nu häbbt 'se bolde dei eiersten twei Wäken inne Schaule all achter sick, dei lüttken Wichters un Junges, wecker van'n Kinnergorn inne Schaule wesselt häbbt. Sei häbbt aals utfunnen, wat in ehr'n Schaultörnöster un ehre Schaultuten was. Funnen hebbt sei sicher uck ein Radiergummi. Tau miene Schaultied näumden wi dat Ratzefummel. Dat is ja ganz wichtig. Wenn dei Kinner an't Maolen sünd, dei eiersten Taohlen und Baukstaoben schriewen mäöt, dann gaiht d'r faoken wat scheiw. Dann mott dat wedder weg. Paor maol düchtig hen un her un wäge is't. Dann kann man nei anfangen, so at wenn d'r nix wäsen is.

Leiwe Tauhörinnen un Tauhörer! Wie wör dat, wenn dat uck so'n Radiergummi för 't Läwen geew? Du häss wat verkehrt maoket, dann dat Ratzefummel rut un wäge is't. Wenn 't doch so einfach wör. Dann wulln wi aale ein't häbben. Kunn ruhig paor Euro kossen un nich bloß 'n paor Cent. Egaol wat't kosset, de Lüüe wüdden et koopen.

Ein Radiergummi för't Läwen, hebb wi dat nödig? Wi Christen brukt dat nich. Us is tauseggt, dat us aals vergäwen wedd, wat us vergäwen wern schall. Wenn wi sägget, Herr erbarme di — dann dait hei dat.

Dat Evangelium van dissen Dag vertellt van den Käönig, dei inlaoet tau dei Hochtied van sienen Säöhn. Aober dei, wecker inlaoen sünd, willt nich kaomen. Dorüm werd aale dei inlaoen, dei woll kaomen willt. Un dei Saol wüdd full, bit up'n lesden Platz.

Nähm wi dei Inlaodung an? Käönt wi säggen: Herr erbarme di? Wat ganz einfach schinnt un nix kost't, is faoken schwor. Väle van us laot't sick aobends noch einmaol den Dag dör'n Kopp gaohn. Väles wör gaut un schön. Wi häbbt aower uck wat liggen laoten, nich aals Gaue daon, wat wi daun kunnen. Dann käönt wi einfach dit Gebett at Radiergummi nähmen:

Herr, ick bün't nich wert, dat du in mien Huus kumms. Man segg bloß ein Woort, dann wedd aals wedder gaud!