Dat kannst mi glööven!
Dei Pate helpt di in't Läwen torechte

vun Diakon Hubert Looschen, Garrel


To'n Anhören hier klicken:


Lesen deit Ludgerd Lüske in Südollenborger Platt.


Use jüngste Enkelkind is vör 10 Daoge nao Schaule kaomen. Dat wör 'n grootet Fest, Oma un Opa wörn uck inlaoen. Bi aal dat Drümherüm häff mi eins besünners gefalln: Jedet Kind kreeg ein'n Paten. Dei Pate gaiht in dei veierden Klasse, kennt sick ut mit dei Schaule, mit dei Rüüme, wat 'd'r daun un watt d'r laoten moss. So'n Paten kannste mit Geld nich betaohln. Hei segg di wat richtig un gaut is, wat verlöwet un wat verbaoen is, helpet di, wenn d'r falln büss, tröstet di, wenn wat scheiw, wenn d'r wat quer loopen is. Dei Pate helpet, dat ut den lüttken Kerl, dat lüttke Wicht ein' Grooten wern kann.

Nao 'n paor Maonde bruuket dei Lüttken dei Grooten immer weniger, sei kaomt immer bäter alleine taurechte.

Alleine taurechte kaomen, dien Weg dör dei Welt gaohn — dat kann man lern, van ein'n Jungen, dei dat erste Maol baoben up'n 10-Meter-Turm stünd un runner springen schull un wull. Aale töwden. Off hei woll sprüng? Hei wull wiesen, dat hei 'n richtigen Kerl wör. Dei Lüe unnen trauden üm dat nich tau. Dei Junge baoben up'n Turm wör sick nich sicher, dat wör dei eierste Sprung ut so'ne Höchte. Un hei wüssde: Springst du nich, lachet dei annern di ut. Aower hei wör noch nich sowiet. Hei rischkede sick, güng trügge nao dei Leddern un steeg daol. Dei Junge güng stolt nao unnen. Hei güng, at wenn hei jüss ne schwore Prüfung bestaohn har. Un hei wüssde: "Noch gaiht' nich van dor baoben daol. Aower dei Dag kump, an den ick springe."

Leiwe Tauhörerinnen un Tauhörer! Mangers mossde verleisen üm tau gewinnen. Nich aals, wat schön lett, wat se aale daut, wat beklatschket werd is wücklich gaut.

Ich haope, dat dei Pate van use Enkelkind ehr bibring, dat du nich immer dei eierste, dei Beste, dei Schönste, dei Riekste wäsen moss. Du moss tau di staohn käönn'. Du moss wäten wat gaut oder wat leip is, wat di wieder bring in't Läwen oder wat di nao unnen trecket. Dat kanns du nich immer alleine, dor kanns gaut 'n Paten bi bruuken. Uck dann noch, wenn du all in de Joahre kaomen büss.


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


8.1.2017


na baven