Dat kannst mi glööven!
Gaoh dien Tempo

vun Diakon Hubert Looschen, Garrel


To'n Anhören hier klicken:


Lesen deit Hubert Looschen.


Väle Lüe jachtert vandaoge van ein'n Termin nao'n annern. Einmaol in Ruhe dörpußen, dor is meist kien Tied för. Dei Öllern äöwerdräget dat all up ehre Kinner, dei häbbt ja uck kien Tied mehr. Lange Daoge, kotte Nächte un dann uck noch leip schlaopen. Irgendwenner is dei Akku los, dei Puste is d'rute. "Burn out" lutt dann dei Diagnose van 'n Doktor.

Dat gifft ja einige Menschken, dei hebbt dann ehr Läwen ganz ümmestellt. Sünd rut ut'n Beruf gaohn, off villicht utwannert. Annere hebbt sick up'n Weg maoket mit Rad off tau Faute, üm dör dei Weltgeschichte tau gaohn. Dat kann aower nich jeder. Dor fählt dat Geld tau.


"Man to! Fixer! Hüh!" — "Hol dien Muul!"

Van eine Schildkröte kann man einen annern Weg lern, dei kien Geld kost. Dei Geschichte is all ganz old. Sei kummp van Aesop. Hei läwede för äöwer 2500 Johr in Griechenland un häff 'ne ganze Riege Fabeln schräwen. Eine van siene Geschichten vertellt van einen Haosen un eine Schildkröte.

Dei Haose mäök sick dor äöwer lustig, dat dei Schuldkröte so langsam wör. Dei Schildkröte schlög vör, dei beiden kunn'n ja maol üm dei Wedde lopen. Dei Haose kreeg sick vör Lachen nich wedder in. Ein'n Wettloop mit dei Schildkröte? Dat kunn ja gor nich angaohn, hei wör doch väle dröcker. Dei Schildkröte geew nich nao, sei wull dei Wedde ingaohn. Dei Haose löt sick d'r up in. Nao den Start lööp hei los. Hei schlög ein'n Haoken nao 'n annern und lachde äöwer dei Dummheit van dei Schildkröte. So wat Dummes wör üm noch seläwe nich begägnt. Hei mök so manchen Ümweg. Hei har ja Tiet naug. Kott för dat Ziel lä hei sick in't Gräss. Hei wull up dei Schildkröte teuwen.

Dei güng den Weg in ehr Tempo. Immer sinnig wieder. Dat Ziel vör Oogen seeg sei den Haosen in't Gräss liggen. Sei güng stiew wieder. Un tatsächlich — sei käöm at Erste äöwer 'n Zielstrich. Ne ganze Riege annere Tiere, dei dat Spektaokel mitkrägen harn und dat seihn wulln, geeben dei Schildkröte luten Bifall. Dor waokde dei Haose van up. Hei wör nämlick inschlaopen, at hei sick in't Gräss leggt har.

Leiwe Tauhörerinnen, leiwe Tauhörer! Gaoh immer stiew weg dien eigen Tempo. Dann kumms du sicher an.


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


12.3.2017


na baven