Dat kannst mi glööven!
Dat Beste kanns nich seihn

vun Hubert Looschen


To'n Anhören hier klicken:


Lesen deit Hubert Looschen.


Marion is 38 Johr. Van Geburt an sitt sei in'n Rullstauhl. Sei häff spastische Lähmungen, kann Hände un Fäute nich regeiern, dat Schluuken fallt ehr schwor, sei kann nich schnacken. Wenn man sei sütt, kann man denken: Marion kann nix, anner Lüe mäöt aals för ehr maoken. Ick weit: Dat stimmt nich. Marion kann väl mehr at manch Gesun'n.

Sei häff einen Glooben, den möchte ick at Diakon gerne häbben.

Wenn sei nao vörne kick un dor kump wat Schwores up ehr tau, sütt sei mangers ein'n Barg ut Steine vör sick. Sei biäet un dann gaiht sei los. Dat Gebett, sägg dei junge Frau, hilpet dorbi, dat ein Stein nao'n annern uppe Siete rullt. Sei stellt sick mangers vör, dat Jesus mit ehr in'n Rullstauhl sitt. "Jesus kann jüss so feuhlen at du un ick", glööwt Marion. Sei häff ein'n Krüüzweg mit säben Stationen maoket. Dor is Jesus einmaol tau seihn in'n Rullstauhl, 'n annermaol mit ne Kugel in'n Buuk un mit ne schwatte Speiseröhre. Marion häff ein'n ganz empfindlicken Maogen, dat Schluuken fallt ehr bannig schwor. Sei is sick sicher: Jesus litt mit ehr.

Inne Bibel häff sei van Maria läsen. Dor köm ehr disse Gedanken bi: Du moss noch maol nao Lourdes. Dat is ein'n grooten Wallfahrtsort inne Pyrenäen. Tweimaol is sei nu all dor wäsen. Dei lange Fohrt, enlick för ehr 'ne groote Strapaze, dait ehr heller gaut. Wenn sei trügge kump, feuhlt sei sick bäter.

Uck wat ehre Arbeit angaiht, kann jederein van ehr lernen. Weil sei nich schnacken kann, mott sei jeden Baukstaoben enkeln in ehrn Computer ingäwen. Vandoage hullt sei mit ehrn Computer Vördräge. Sei verklort Lüe, wat man daun un wat man aals schaffen kann, uck wenn man kien Wort säggen kann.

Wat einer sütt, is lange nich aals. Wenn du Marion süss, kanns nich glööwen, wat sei aals kann. Ick kenn kiene Frau, dei mehr leistet at sei. Sei kann mi dat Glööwen bibringen un möck mi klor: Dat meiste un viellicht uck dat Beste kanns du mit dei Oogen nich seihn. Un noch eins verklort sei mi: Mit Gott giw dat immer ein'n Weg.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


17.3.2019


na baven