Dat Määrken von Corona un ehr Leev-Tackens

vun Heinz Großmann


Dor weer maal en allerleefst, sööte, lütte Deern. Ehr Öllern geven ehr den Naam Corona, wieldat se al bi ehr Geboort en lütt Kroon op ehr'n lütten Kopp to sitten harr. De Öllern keken jümmers full von Leev op ehre Dochter mit de lütte Kroon. So is se ranwussen un mit de Johren is ut de lütte, sööte Deern en grote, plietsche, smucke, sööte Deern worrn. Un uk de Kroon hett vele güllen Tackens dorbi kregen.

Wiel dat us Corona uk so veel Leev in ehr Hart harr, hett se jümmers, wenn se en netten Minschen bemöten dee, sik en von ehr velen Tackens ut ehr Kroon afbraken un em geven. So kreeg he uk Leev in't Hart. Un jümmers, wenn se en Leev-Tacken afbraken harr, is dor en neen nawussen. Un uk wenn de annern Minschen von ehr Tackens een an en annern Mischen afgeven deen, is ehr in't Harte en neen nawussen.

So güng Corona dör de Welt, verdeelde ehr Leev-Tackens, un de een von ehr kregen harren, geven von sik en wieder. Un so keem dor jümmers mehr Leev in de Welt. Man dat geev uk ja Minschen, de harrn jümmers man "Ik, ik un ik" in Hart un Kopp. Un de gefüllt dat ja nu gor nich, wat us Corona mit ehr Tackens so anrichten dee. Un se versöchten, uk von de Tackens en to packen to kriegen. Man bi se is de güllen Tacken foorts in ehr Hart to en swarten Iesenklumpen tosamensmolten, de koolt un swoor in ehre Bost seet un den nüms afhebben wull.

Gegen de Leev in de Welt kemen so de Ik-Mischen nu nich an. Un wenn Corona nu nich storven is, den verdeelt se jümmers noch Leev-Tackens von ehr Kroon an all de Mischen, de mit apen Hart dör de Welt gaht.

Dat weer en to schöönen un wunnerboren Droom! Man dat is ja man blots en Määrken, mag de een of anner woll seggen. Avers is nich in jeedeen Määrken uk jümmers en Spier Wohrheit versteken. Kiek doch mal to, of du nich so en Tacken von Corona ehr Kroon to packen kriegen kannst. Denn warrt dat Määrken dör di villicht so 'n beten wohr.


6.6.2020


na baven