De Hoot is weg

vun Heinz Tiekötter


Aktienkurse ward vun Verkeupers schreben. De Vertreters buten an de Front bestümmt, wat 'n Loden goot löppt; nich de Bookhollers in'n Büro, de olen Sesselpuper. Vertreters sünd jo ok veel plietscher.

Hannes Lehmann steiht vör'n Schriefdisch vun sien Personoolchef un leggt em siene Spesenafreeknung vör. De ole Knigger, de jümmers so deit, as wenn he allns ut de egen Tasch betolen mutt, kiekt sik elkeen Positschoon genau an. Denn schüttkoppt he un froogt Hannes, wat de em op'n Arm nehmen will? Dor steiht in ene Spalte "een Stück Herrenhoot, Pries 80 Euro."


Do weer de Hoot ja noch en Diesel-Opper!

Hannes verkloort em dat mit den Hoot: "Ik weer op'n Weg to'n Kunnen un stunn op de Autobohn in'n Stau. Lange Tiet röögt sik dor nix. Mien Termin rück näher und näher. Mi lepen de Minuten weg. Dorüm bün ik utstegen un heff no vürn keken, wat dat nich bald wiedergüng. Nu weer dat an düssen Dag beus windig un een vun de vermaledeiten Böen ritt mi den Hoot vun Kopp un de flüggt öber de Mittelplank op de annere Autobohnsiet. Rumms, suus 'n groten Laster öber dat gode Stück henweg un hett em platt mookt. Ik müss em doch ersetten."

"Mann", säe de Personool-Heini, "dat is doch nich uns Firma ehre Sook, wenn Se nich beter op ehr'n Hoot oppassen köönt!" He schuuf de Afreknung trüch no Hannes un säe em, he sull de man nochmol moken; denn ober ohne den Hoot. Den ward de Firma nich betolen.

Hannes güng trüch an sienen Schriefdisch un hett de Afreeknung nochmol mookt. No de Meddagspaus stunn he wedder vör den Personoolchef un legg em de List op den Disch. De Personool-Heini öberflöög de Opstellung. Denn hett he se aftekent un se mit de Wöör trüchgeben: "Sehn Se, dat geiht ok ohne düssen Hoot!"

Op den Weg to de Kass kunn Hannes gornich an sik hollen un hett jümmers vör sik hen lacht. Op'n Gang bemööt he 'n Kolleeg. De wull weten, worüm Hannes so vergneugt weer. Jo, säe Hannes, ik heff ok allen Grund, un vertell em vun sienen Hoot un öber dat Gespreek mit den Personoolchef.

"Un wat mookt di nu so vergneugt?", wull sien Kolleeg weten.

"Dat is doch ganz eenfach", anter Hannes. "De Hoot steekt in de Afreknung mit binn; man de Keerl ward em gewiss nich finnen. Dorför is de nich plietsch genoog!"

Hannes, du büst een...

...Hütchenspeler!


9.6.2020


na baven