Gesund blieven vun Silke Frakstein Dat is gor nich so licht in'n Momang un de Medien mookt di ganz wuschig. Wi hier in Hamborg sünd notürlich dörch den Flughoben etc. besünners ünner Druck. Un wenn de Lüüd ok meckert, de ut'n Urlaub hebbt nu mol den Schiet mitbröcht. Un mit jeedeen Fleeger, de kümmt, warrt dat mehr. Veele Lüüd hebbt noch nich begrepen, dat allens nich mehr
so is as an'n Anfang vun't Johr. China weer wiet weg, wat hebbt wi
dormit to doon? In so en Tiet hölpt blots noch Ruhe deep Luft holen un villicht ok mol wedder an den Nober denken. Mitn'anner snacken un de Stille op de Stroten un de Roh an'n Heben geneten. Ober
wat mookt de Lüüd? Se bunkert Toilettenpoppier, orrer klaut
dat ok noch. Mit Klopapier heff ik ok all veel beleevt: Idomeneo von Mozart in de Staatsoper. De Sänger weern allerbest un hebbt de scheune Musik wunnerbor sungen. Ober de Kostüme weern ut Klopapier. Dor weern de Sänger mit inwickelt un hebbt sik no en Tiet jümmers dreiht un so dat Klopapier afwickelt. Ik heff de Ogen dicht mookt. Un denn heff ik mol as junge Deern en ganz wichtige Afsprook mit'n
Mannsbild op Klopapier schreben. Toeerst much ik dat bi den Afkoot
gor nich seggen. Wenn Klopapier en so groote Rull speelt, dennso heff ik dacht, ik recherchier mol. Mit veel Opwand warrt dat Poppier herstellt. Zellstoff aus Kiefer, Fichte, Bark, evtl. Eukalyptus. De Rest, dat Lignin, warrt dör en Bleekvörgang ruthaalt. De Alternative ut Altpapier liggt bi 24%. Freuher, ober ok hüüt noch, nimmt man Bläder vun'n Pestwurz, ok Arschwurz seggt man dorto. All in dat 14. Johrhunnert hebbt de Chinesen, in de Provinz Nanjing, so an de 720.00 Blatt bruukt. In Europa geev dat Lappen, Wollbällchen, Moos, Stroh etc.
No den Krieg geev dat Zeitungspoppier un nich to vergeten dat Klopoppier in de DDR. Ruug, hart un deelwies mit lütte Holtsplitter. Nu köönt wi uns dat utseuken: 3-lagig, 4-lagig, mit Duft orrer Blümchen, mit'n Hart, mit'n Geldschien un wat weet ik nich noch allens. Apropo Geldschien: De Udls gifft nochmol den Henwies: Keine Wertgegenstände im Auto liegen lassen! Ach du Schreck, ik mutt Sluss moken. Dat Klopoppier liggt noch in't Auto! 8.4.2020
|