Tramünner Klönsnackrunn 1985

Reed to de Grünnen 1985 vun Rolf Schwippert


Tramünn, den 30.Dezember 1985

Leef Frünnen un leef Lüüd. Ja, rievt juch man de Oogen, ik grööt juch eenfach alltohoop up Plattdüütsch. To'n Glück sünd wi in Tramünn to dies Tiet noch 'ne ganze Reeg, de de Spraak vun uns Öllern un Vöröllern noch verstah'n un snacken doot.

Ik heff juch tosamenropen, üm den Vörslag to maken, dat wi tosamen in Tramünn een Klönsnackrunn in de Gang bringt.

Ik frei mi un segg juch Dank, dat ji all kamen sünde Besonners frei ik mi, dat mehr kamen sünd as ik ropen heff. So is dat ok to wünschen. So sull dat in Tokunft ok sien, dat mehr kaamt as wi inlaadt hebbt. Gäst sullen uns to jede Tiet willkamen sien. In Tokunft sullen ok Fruen, besonners uns egen, in düsse Runn dorbi sien.

Noch sünd wi ja nich alltohoop Frünnen, aber ik höp, dat wi dörch uns plattdütsche Spraak un dörch disse Runn noch mal all Frünnen warrt.

Warüm süllt un wüllt wi denn disse Runn in de Gang bringen?

Wi wi all belevt hebbt, hett dat Snacken vun Platt na de veertiger Johren öber de Maaten nalaten, dat en angst un bang dorvun warrn kann. Mi dücht, dat warrt Tiet, dat wi endlich mal uns plattdüütsche Spraak ünner de Arms griepen doot. Wi sullen, de wi noch to de letzt richtige Plattsnacker-Generation höört, bigah'n un uns Platt hegen un plegen, so goot as wi dat köönt.

Tramünn, as en Placken, wo fröher nur Platt snackt worrn is, wo in de School Hochdüütsch de erst Frömdspraak weer, dor sullen wi doch versöken, een Reeg Lüüd up'n Dutt to kriegen, un se dor to bringen, wedder Platt to snacken. Wi sullen versöken, Tramünn wedder to en Hoochborg vun Plattsnackers to maken. Darüm sull de Naam "Tramünn", so meen ik, ok in den Naam vun uns Klönsnackrunn mit upnahmen warrn.

Wi mütt uns dorbi aber vör Oogen kriegen: vun nix kümmt nix. Allens, wat wi för de Klönsnackrunn gern harrn un gern wüllt, dat mütt wi selvst in de Gang bringen. Wenn wi all en beten dorbi mitdoot, denn sull uns dat nich alltoswoor fallen. Tosamen anfaat, hett schon mancheen Boom ut de Eer reeten.

Anstött, disse Runn tosamen to ropen, hett mi en Tofall. Ik weer vör fast een Johr in Dolbarg bi Hamm in Westfalen, in en westfälsche Plattsnackerrunn inlaadt. De Runn, un dat wat se dor makt hebbt, hett mi good gefullen. Ik heff mi gliek dorbi dacht, wat anner künnt, dat sullen wi doch allang könen.

För welk Lüüd wüllt wi denn nu düsse Runn in de Gang bringen?

Ik wörr seggen, för all de, de Plattdüütsch snacken doot. Aber ok för de, de nich Plattdüütsch snacken köönt, de aber an Plattdüütsch Spaß un Freu hebbt. Dat sull en Runn warrn för Frünnen vun Platt, egal wat för en Platt oder Hoochdüütsch se snacken doot.

Klönsnackrunn, wat wüllt oder sullen wi dor ünner verstah'n ?

Erstmal denk ik, dat wi gemütlich tosamensitt, üm to klönen un üm klook to snacken. Denn hüüttodaags is dat doch oftmals al swoor, enen Plattsnacker to'n Klönen to finnen.

Wieder wüllt wi ok Geschichten un Döntjes vertellen un hören. Wobi ok Seemannsgorn un ok Fischnettgorn verspunnen warrn dörft. Ok sullen wi uns ut de veelen Böker vun de plattdüütschen Schrieberslüüd wat vörlesen oder vördregen.

Denn sullen wi ok seh'n, dat wi af un an vun wo anners Schrieberslüüd oder Geschichtenverteller inladen köönt, de uns ut ehr Saken wat vördreegt oder -leest.
Versöken sullen wi wieder, olle un nie Geschichten un Döntjes öber Tramünn, öber Buwarken, öber Hüüser un Lüüd ut Tramünn to sammeln. Versöken ok, dat allens för latere Tieden to Papier oder up Tonband to bringen.

Wat wi later noch allens maaken künnt oder wüllt, dat sullen wi latereenst besnacken.

Klönen un Klönsnack hollen, wat meent dat eegentlich?

Dat Wöörbook meent darto, gemütlich praten un vertellen, lichte Ünnerhollung maken, ok mal öber belanglose Dinger snacken.

Ik meen, so sullen wi dat ok hollen. Wi sullen nich allens so doodernst angah'n un ok öber belanglose Dinger snacken un klönen.

Darum laat uns nu losleggen mit dat Klönen un Klooksnacken. Laat uns dorbi höpen, dat Larm- un Mießmaker üm uns Runn ümmer enen groten Bagen maakt, damit wi in Roh un Freden unsen Klönsnack hollen köönt.

De Roper


Rolf Schwippert woor 1925 in Lübeck boren un is in Lübeck un Tramünn plattdüütsch opwussen. He woor Ingenieur, hett avers de mehrste Tied in Tramünn leevt. He is in'n August 2015 doodbleven.

Rolf Schwippert hett nich bloots den Tramünner Klönsnack grünnt un vele Kortgeschichten, Reportagen un Glossen för Bläder un Anthologien schreven, he hett ok dree Böker verfaat:

Fiete lehrt Plattdüütsch. Fibel für Anfänger, Kinder und andere Leute

Rolf Schwippert, Travemünde
Husum Druck- und Verlagsgesellschaft

ISBN 978-3-89876-227-4
Im Buchhandel € 7,95

   

As dat männichmal so kümmt

Rolf Schwippert, Travemünde
Husum Druck- und Verlagsgesellschaft

ISBN 978-3-89876-363-9
Im Buchhandel € 5,95

   

Graaf Luckner un anner Lüüd. Wat een allens beleevt hett

Rolf Schwippert, Travemünde
Husum Druck- und Verlagsgesellschaft

ISBN 978-3-889876-472-8
Im Buchhandel € 7,95


23.8.2015


na baven