En Angeliter vertellt:

vun Helmut Marxen

Opleevst fohr ik jo mit mien egen Kutsch, aver bi stüttig höger noteerte Benzinpriesen is so'n lütte Bustuur nich verkehrt. So dachen mien Fru un ik, as wi uns annerjohrs för en Fohrt mit Stadtbummel in Hamburg anmelln deen. Twölf Euro pro Nees schull de Reis mit'n "Luxusfernreisebus" kosten, ünnerwegs noch "gutbürgerlicher Mittagstisch in einem urgemütlichen Landgasthof" bavento. Teihn Daag later weern mien Fru un ik pünktlich op de Parkplatz in unse Kreisstadt, wo de Reis losgahn schull. Masse Lüüd tövten dor al op de Bus, de denn ok glieks schneidig üm de Eck keem. To schneidig för mien Fru un mi, denn vör dat wi unse egen Kutsch afstellt harrn, weer de Bus proppevull. Blots noch twee Nootsitzen weern nableven, de kregen wi beiden denn.

De dore Busfohrt wurrn mi Fru un ik wedder an to denken, as wi nu vun unse Kinner Friefohrt för en Utfloog na Schwerin to Bundsgoornschau schenkt kregen. Aver nu geev't reserveerte Plätz mit komodig weeke Polster, Nacken- un Footstütz, Knööp för Klima, Musik un Lamp. Sogor smalle Kabien för un kaam in Nootfall bi vulle Fohrt ut de Büx weer in unse Schwerin-Bus.

Fründliche Fohrer un vergnögte Mitfohrers bröchen nu bi de nüe Tuur foorts nette Luun in de Kraam. Bi unse Hamburg-Tuur dorgegen wurr nich veel klönt un lacht. Dorför harrn wi över Autoradio de dullste Knüppelmusik. Passe mehr to de junge Fohrer as to sien orig wat öllere Mitfohrers. Ok mien Fru un mi hölle dat Gejaul munter; inslapen deen uns de Fööt, denn wi weern op de Nootsitzen wat knapp mit Platz för unse Beens.

Nu bi unse nüe Busreis wurr op bummelig halve Tuur Statschoon makt för Fröhkost bi en Raststeed dicht achter Lübeck. Fardig indeckt weer allns för smackliche Fröhstück mit frische Rundstücken un Tobroot, Kaffee un anner Drinkels. Allns op reserveerte Platz extra för unse Bus püükfein torechtstellt. Wenn ik dorgegen an unse Tuur annerjohrs denk! Na annerthalf Stunnen mit Kribbelbeens un Radaumusik weer Verpuust un Middag mit'n wat kümmerliche Bradwuss, dorför aver mit veel Suurkruut un rieklich Semp op Papptellers. Ach so, dat heff ik noch vergeten: För ünnerwegs weer uns do jo ok noch "Teilnahmemöglichkeit an einer Verkaufsschau" toseggt. Dat gung in de wat düüstere un verrökerte lütte Saal denn ok bald los. Twee Keerls un en Frunsminsch, alle dree aalglatt un kattenfründlich, vertellten uns do, wat se antobeden harrn. Gung to Hauptsaak üm Wulldecken to Extrapries as Hölp gegen allns, wat uns öllere Minschen nachts dörch Rieten un Kniepen piesacken kunn. Wenn dat denn noch nix bringen schull, so geev dat noch Spezial-Heizküssens. Allns to Priesen, dor kunn keen Fachgeschäft mithooln. Vertellten uns tominnst de twee Keerls, un dat Frunsminsch nickköppe mit sööte Mien. Dat Geschäft leep goot, besinn ik mi. Glieks achteran kutscheer de wat griesmulige Busfohrer denn noch kotte Streck wieder mit uns bit na Hamburg. Sien Kontrakt weer aver dormit afloopen, sä he, dat he uns för'n Stunnstiet bi de Lannungsbrücken afsetten dee. Dat lange nich för dit un nich för dat.

Dat Teel lockt: De prächtige Bundsgoornschau in Schwerin! Foto: H. Marxen

Willkamen bi de Buga! Foto: H. Hinz

Nu bi unse nüe Busfohrt gung dat na rieklich Fröhkost un achteran ohn Hast frische Luft optanken wiederlang dörch smucke Alleestraten, so as wi de överall in dat schöne Meckelnborg wennt sind. Un denn dat Belevnis in Schwerin mit grootordige Goornschau bi Slott un Schweriner See!

Frieluft-Kunzert op de Buga. Foto: H. Marxen

Rosen op de Buga. Foto: H. Hinz

Kandidel spazeerten wi bi Sünnschien dörch staatsche Anlagen mit vulle Pracht in Blatt, Bloom un Boom. Dat weer'n Staat un sehn sik an rundüm bi dat Märkenslott mit all sien Turmspitzen. Güntsiets de Schweriner See, na dat wi över de extra för de Goornschau anleggte Pontonbrüch wannert weern, gung dat in duftige Rosenfeller sietsbi de Marstall wieder. Nich satt sehn kannst di ok bi so'n Spazeergang dörch all de Themengoorns un Blömerhallen. Allns tohoop en Belevnis, wat mi un mien Fru jüst so as wull ok all de anner Mitfohrers in unse komfortable Bus bannig gefulln hett. De Indrücke kann man nich so gau vergeten.

Foto: H. Hinz

Pavillon an'n See. Foto: H. Marxen

Vergeten wölln wi nu aver de argerliche billige Tuur vun annerjohrs na Hamburg. De gung dormit to Enn, dat mien Fru un ik na de dore "Weltstadtbummel" wedder in unse egen Kutsch ümstiegen deen. Wi bleven do wat deepdenkern still. Unse Autoradio ok, denn op de Parkplatz in unse Kreisstadt weer uns de Antenn afbraken wurrn. Weer jüst so knickt as mien Fru un ik na de dore billige Reis.

Aver de schöne Fohrt na Schwerin hett uns bannig gefulln. Morrn wölln wi uns to nächste Busfohrt na de Bundsgoornschau anmelln. Wölln de Harvstblööm dor bewunnern, vör dat de Utstellung to Oktobermaand de Schotten dichtmaken deit.

Nix wie hin! Foto: H. Hinz