De hässliche Swatte?

Een swatten Droom

vun Heinz Tiekötter

Hannes stunn sien Leevdag mit de Afrikoners op'n Kriegsfoot. He kunn mit jem nich trechkomen un much jem nich lieden. In de Fofftiger Johrn is Hannes as Jungmann un as Matroos an de afrikonsche Küst op un dol fohrt. Dor weern de Swatten noch nich so good an de westlichen Manieren anpasst as hüüt. Se kunn'n den witten Mann nich richtig verstohn un de Witten jem all lang nich. Wenn de swatte Schuermann sik 'n Lütten köfft or Drogen nohmen harr, kunn he licht de Kontrull öber sien Hanneln verleern. Denn güngst em beter ut'n Weg. Blots, an Bord weer dat jo nich meuglich.

Eenmol in'n Kongo hett so'n besopenen Hobenarbeiter Hannes in't Gesicht slogen. Wenn Hannes dat wullt harr, harr he em licht verhaun kunnt. Man he wüss genau, dat he denn in'n Kaschott komen weur, un de sünd in Afriko nich so kommodig as bi uns. Un ohne em as Stüermann kunn dat Schipp nich wiederfohrn. Hannes hett he de Teen tosomenbeten, hett sik ümdreiht un is op siene Komer gohn, wo em de Tronen vör luder Wuut öber de Wangen lepen. Vergeten hett he dat in dottig Johrn Afriko-Fohrt nich. He bruuk bloots 'n Swatten sehn un düt Beleevnis fallt em wedder in.

Nu is Hannes all lang in Penschoon. Man öber de Afrikoners lästern un schimpen deit he jümmers noch. He will mit jem nix to doon hebben. He kann jemmer Oort nich lieden.

Annerlest weer Hannes teemlich süük. He leeg in de Klinik in Barmbek op de Intensiv-Statschoon. Dat stünn so beus üm em, dat he vun de Dokters för söben Doog in en künstlich Koma versett worrn is. Weest du, wat in'n Kopp vun en Minsch aflöppt, wenn he vun buten nich antospreken is? Dröömt he? Un wenn jo, wat sünd dat för Drööms? Löppt dat bi em as'n Film af un he hett all de Biller un Beleevnisse vör Ogen un mookt dat Gode un dat Slechte in'n Droom noch eenmol wedder dörch?

Ik weet vun mi sülmst, dat dat Opwoken ut en Narkoos teemlich tüksch sien kann. Vör de Narkoos heff ik keen Bang, man vör den Ogenblick, wo ik wedder to mi koom. Du liggst in dien Bett, de Albdroom piert di noch, du sleihst de Ogen op un weetst nich glieks, woneem du büst. Du büst an't Kämpen un versöchst di to besinnen. Woso liggst du in en Bett? Wat sünd dat all för Geräte an de Wand un worüm büst du verkobelt?

So stell ik mi ok den Momang vör, as Hannes to sik komen is un de Ogen opslogen hett. Denn hett he no de linke Siet keken, dor weer blots en Döör. Nu keek he no de rechte Siet. Vun dor keem dat Licht; dor weer en groot Finster. Un vör dat Finster stunn noch 'n Bett. Dat weer de Ogenblick, wo Hannes meen, he drööm jümmers noch, un he harr dat hild, siene Ogen gau wedder tootmoken. Denn mook he se wedder op un keek 'n twetet Mol no dat annere Bett röber. Wohrhaftig, in dat Bett leeg en Swatten! Een, twee Minuten hett Hannes dorop teuvt, dat he nu to sik keem un dat de Droom ut sien Kopp verswinnen deit. Denn hett he faststellt, he weer all lang wook.

De Rest is gau vertellt: De swatte Mann nick Hannes fründlich to un stell sik vör. He vertell in allerbest Düütsch, dat he an dat amerikoonsche Konsulot arbeit, 'n Slaganfall kregen harr, nu ober öbern Barg un op den Weg no de Beterung weer. He hett siet veer Dogen dorop teuvt, dat Hannes opwook un he sik mit em ünnerhollen kunn. Hannes is in Sloop bannig unruhig west. De beiden legen noch 'n poor Doog tosomen op de Stuuv un kemen ganz goot mit'nanner ut.

Hannes snackt nich doröber, wat he nu siene Instellung to de Swatten ännert hett. Man mi dücht meist, he schimpt in de leste Tiet nich mehr so dull öber jem.