Tunnelblick

vun Heinz Tiekötter


Dree Partien wohnt in dat Huus, wo Peter in leevt. Peter is mit siene 81 Johr de Öllste un is blied, dat em dat Erdgeschoss toheurt; wegen de Treppenstufen. Ok de anner beiden Wohnungen stoht in Egendom. Links öber Peter wohnt 'ne Finanzbeamtin alleen un op de rechte Siet een Udl un siene Fro. He is all Hauptkommisor un se arbeit in'n Kinnergorrn un bringt de Lütten bi, wat se för ehr Leben an Fliet un sotscholet Verhollen bruukt. Egentlich sünd se alle dree Ordnungsheuder.

Peter meent, dat se alle dree en Tunnelblick hebbt. Dat is'n beuse Sook, meent Peter. Nich för jem süllmst, nee, för Peter! Se seht nich, wenn dat Treppenhuus schietig is, wenn de Vörplatz feegt warrn mutt, wiel dat de Harvstwind Bläder un Spröckelholt öber dat gemeensome Grundstück verdeelt hett. Wenn dat Loof öber den Rand vun de vulle Dackrinn kiekt, is de Udl nich koppfast. Denn mutt Peter dor hooch und de ole Dussel will jem elkeenmol bewiesen, dat he dorför noch fit is un noog Knööf hett.
Af un an haut se em op de Schuller un meent, he kunn wull vun Glück seggen, dat he in sien Oller noch so fix op de Patten is un so krekel.

Dorüm blievt se ok oftens in de Puuch or op de Kautsch liggen, wenn de Breefdräger pingelt, wiel he en Päckchen för jem hett un en Ünnerschrift bruukt. He pingelt sowiso all meist bi Peter un de leggt sien Mitbewohners dat denn op de ünnerste Trepp. Dor stolpert se obers nich öber. Se hebbt sotoseggen een partiellen Tunnelblick. De sett denn eerst wedder in, wenn se op ehrn Kalenner kiekt un faststellt, dat se düssen Moond an sünd, de Affalltünn boben an de Stroot to stellen.

Denn mookt Peter dat. Hen un wedder hett Peter ok dat Gefeuhl, dat se achter de Gardinen stoht, em beobacht un öber em lacht. Sünnerlich denn, wenn he de Stroot längs denn Kantsteen feegt.
Op Peter kann sik een verloten!


17.3.2019


na baven