As sei nu dune bi Jerusalem wörn, bi Betfage
an den Öljebarg, schickde Jesus twei Jüngers vörut
un geev ehr den Updrag: Gaoht in dat Dörp, dat vör jau
ligg, un dor wer gi eine Äselstute finnen mit ein Faohlen dorbi.
Binnt dei los un bringt mi dei her! Un wenn jau ein'n dornao fraogen
deit, denn segget: Dei Herr mutt dei bruuken. Denn kriegt gi dei
forts mit. Dat passeierde so, dormit erfüllt wörd, wat
dei Prophet vörutsä: "Vertellt dei Tochter Zion:
Süh, dien Käönig kump nao di her, sachte un hei ritt
up einen Äsel un ein Faohlen, dat Junge van ein Lastdeiert."
Dei Jüngers güngen hen un döen dat, woräöver
Jesus ehr Order geev un haolden dei Äselstute un dat Faohlen
un läen ehr Tüg doräöver un hei settde sik dorup.
Aover orig masse Lüe läen ehr Tüg breit up'n Weg,
annere schlögen Teuger van dei Böme un streiden dei up
den Weg. Dat Volk aover, dat üm vörutgüng un naolööp
rööp: Hosianna för David sienen Säöhn!
Lobet wes, dei dor kump in'n Naomen van den Herrn in dei Högte!
Mt. 21, 1-10