Passion 2015:
Grööndunnersdag

vun Rudi Witzke

Wat ist Wohrheit?

Jesus un Pilatus: Wat is Wohrheit? Bild vun Nikolei Ge

Jesus seggt to ehm: "Ik bün de Weg un de Wohrheit und dat Leven. Nüms kümmt to'n Vadder denn dörch mi."

Tweimaal kaamt se an dissen Dag tosamen, de Gröön-Donnersdag, Witt-Donnersdag un Grein-Donnersdag nöömt ward. "Gröön", wieldat een an dissen Dag veel Grönes eten schall. Een seggt ok Hoge Donnersdag un Palmdonnersdag. In uns Landskarken ward an dissen Dag ierst an Avend in Erinnern an dat Letzt Mahl vun Jesus mit siene Jünger en Gottsdeinst fiert. De Sprakenforscher seggt, dat all disse Naam falsch düüdt ward. "Gröön" kümmt vun "greinen". Un dat bedüüdt "wenen", "hulen", even "greinen". Woso mütt wi all greinen, dat wi sogoor halfmast flaggen?

En Levlang liernst jümmer wat to. Maal weern wi Grööndunnersdag in Dänemark up de Inse Fanö. Wat wunnerten wi uns! An alle Hüüs un wo Dänen wahnten un tohuus weern, weihte de Danebroog op Halfmast. De Ladens weern slaten. En Schild hüng in't Finster: "Hillige Daag er hillige Daag. Butikke lukket." Kaarfriedag weer denn normale Arbeidsdag. Dor weren de Danebroogs verwohrt un de Koopmann-Ladens apen.

Nu, wo ik teemlich old bün, heff ik mi de Fraag wedder stellt, de wi uns domaals avends in dat Huus achter de Düün ok stellt hebbt. Wi hebbt uns fraagt: Wokeen kunnen wi vun de velen Minschen sien, de an dissen Dag röhrend, brüllend orrer mit Tranen in de Ogen dörch Jerusalem tröken, kröpen, sliekerten. Orrer harrn wi uns vör Angst verkropen orrer weern weg ut de Stadt lopen? Disse Fraag müßten sik ok de Dänen stellt un in Schaam fastellt hebben, dat se elkeen Rull ok harrn innehmen kunnt. Dor schaamten se sik. Un flaggt se dorwegen halfmast? Is dat so? Wi warden dat wiss uns Leevdag nich daun. Wat wi dorwegen stolt sien köönt?

So sehg de Maler Munkacsy dat Urdeil vun Pontius Pilatus över Jesus