Passion 2021:
Sexagesimae

vun Marlou Lessing, Biller vun Elfi Riemenschneider


Düssen Dag, wenn ji sien Stimm hören doot,
sluut juun Harten nich to!

Hebräer 3, 15


Klick op to'n Vergröttern!

Wi höört Jesu Stimm, Gotts Stimm nich jümmers.
Och wa faken wünscht wi uns, wi kunnen ehr höörn — een Woort tominnst!
Een godes Woort, wenn wi dat nödig hebbt —
denn all sien Wöör sünd good.

Un denn gifft dat Stünnen, dor höört wi sien Stimm ganz düüdlich —
"Du weetst, wat du doon schullst!", seggt se,
"Ik heff di seggt, Minsch, wat good is un wat ik vun di will:
Holl di an mien Wöör, hannel na de Leevde
un mark op, wenn ik mit di snack!"
Un faken passt uns dat nich. Denn sluut wi uns Ohren
un Harten.

Nu geiht Gott mit uns den Weg op de Passioon to.
Wennehr warrt wi stocken?
Wüllt wi düssen Weg wirklich gahn?
Wat seggt uns Gotts Stimm dorto?

Se seggt: "Du büst frie. Du kannst dat Lieden utbögen.
Avers tru mi.
Düsse Weg is de rechte. Gah mit mi, wenn du mi truust.
Ik warr jümmers mit di gahn."


7.2.2021


na baven