Reformationsfest 2017:
Dat Christusfest

vun Pastor Hans-Eberhard Schulz


Oh, oh, wat lees ik dor? Dor ward Geld in de Hannen nomen. An Steden, wo Luther leevt un warkelt hett, hei un sien Mitreformers. Dor warden Buuwarke renoveert un ehr Ümfeld. So schallt Touris up Wallfohrt gahn. Events warden anbaden, meetings vun Politikern vun Herrn vun de Karken ut de hele Welt.

Vördreeg un Schriften setten sich mit Dr. Martinus Luther uteenanner. Een süht ehm kontovers, kritisch un nich mihr as Hilligen. Dat is maal wat anners. — Ja, sogoor de Bibel is renoveert worrn. De Lutherische un de Katholsche. De Bibel schull maal vun't Volk leest warden können, dat sik elkeen en wohres Bild vun den Gloven maken maken kunn. Dat weer de Anfang, vun de Autoritäät vun de Kark un de Herrscher vun disse Welt Afstand to nehmen.

Up Religionskriege folgten up manch een Ierdteil Religionsfrieheit un Demokratie. Dat Evangelium weet de Antwoord up de Sorgen un Probleme von de lütten Lüüd.

Un hüüt? De Reformatschoonsdag, de 31. Oktober 2016, schall över alle Genzen en Fierdag sien, aftrennt von dat weltwiede politsch Chaos. Wokeen aver haalt den modernen Minschen in, de sik in den Konsum vun de alles ünnerpläugende "Medienwelt" flücht?

De Minsch hett över dat Kiekschapp un den Mobilfunk mit Hunnerte Frünninnen un Fründen Kontakt. De Navers avers sünd wiet weg, un straken ward de ehm nie. Sik sülfst in de Wirklichkeit to beleven, dortau hett de moderne Minsch keen Tied. Dat aver weer dat,wat Jesus andreev, sien Familje to verlaten, dat Leven in de Mitminschlichkeit to söken.


De Lutherroos, Luthers Wappen

Wat "Christus treibet", weer ok dat Maat, an dat Luther de velen Stimmen in de Bibel indeilte. As Luther de Bibel översette, markte hei woll, dat de Schriever en veelstimmige Chor weer, de Jesus to en Hilligen mit veele Gesichter maakte. Jesus wull bloots Minsch ünner Minschen sien. Hülp weer sien Gottsdeinst. För dissen Gottsdeinst nehm Jesus den Doot an't Krüüz in Koop.

Dat schull ok hüüt dat Fiern to de Reformation bestimmen.


Platt mit de Hülp vun Rudi Witzke
5.10.2016


na baven