Passion 2013
Sönndag Reminiscere

Giff mi Vergäbung un Leit

Van David. Tau Di hoch häw ick miene Säle, Jahwe.
Mien Gott, ick verlaot mi up di: Laot mi nich hangen! Günn miene Feinde nich dissen Gewinn.
Wekker up di haopet, werd maläwe nich vör den Kopp stött, doch wekker di grundlos verlaoten deit, verlüß dat Anseihn.
Wies mi, Jahwe, diene Wäge, lehr mit dat tau daun, wat du wullt.
Leite mi dör diene Wohrheit un lehr mi wat, denn du büs dei Gott, dei mi helpet. Dag för Dag haope ick up di.
Denk an dien Erbarmen, Jahwe, un an dei Bewiese van diene Gunst, denn dei wören all ümmer dor.
Denk nich an miene Jugendsünden un an miene Leipkeiten! Denk in diene Leiwde an mi; dau dat, denn du büs gaut, Jahwe.
Jahwe is gaut un gerecht, dorümme belehrt hei dei Sünders.
Dei Daolbögten föhrt hei in sien Recht un lehrt ehr Künne äöwer sienen Wäg
Aals, wat Jahwe deit, is wiss Gautheit un Wohrheit för dei, dei sienen Bund un siene Gebote achtet.
In dienen Naomen, Jahwe, vergäw mi miene äöwergroote Schuld.
Wat is mit den, dei Jahwe achtet? Üm wiest hei den Weg, den hei nähmen schall.
Hei läwet in Freeden un Glück un siene Kinner hört dat Land.
Up den Gottgefälligen verlett sick Jahwe. Hei nimmp dei up in sienen Bund.
Miene Oogen häbbet Jahwe ümmer in'n Blick, denn hei trecket miene Fäute ut dat Nett.
Denk mit Gnaode an mi! Denn ick bün einsaom un elennig.
Maok mien Harte frei van Bangigkeit un nähm den Druck van mi af.
Kiek up mien Elend un up miene Not, vergäw mi miene heele Schuld!
Süh, miene Feinde sünd mehr worn! Aohnewäten groot is ehr Hass.
Wachte äöwer mien Läben un wohr mi! Laot mi nich unnergaohn, denn ick seuk ein Unnerkaomen bi di!
Unschuld un Ehrlichkeit mäöget mi schützen, denn ick räke mit di.
Erlöse Israel ut aale siene Not, Gott!

Psalm 25


Montage: Ludgerd Lüske. Klick up tau'n Vergröttern!

Kemmer: Christus un dei Ehebräkerschke — Vergäbung
Inschrift ünner dat Bild

Originaol

"MEISTER.DESSE FROVWE.
IS.BEGREPE(N).UP.FRISKER.DAETH/
IN.DER.EBREKERI. MOSES.HEFT.
UNS.IM.GESET.GEBADEN./SULKE. THO:STENEN.WAT.SECHSTV//
WOL.MANCK.IW.ANE./SVNDE.
IS.DE.WARP/DEN.IRSTEN.STEN.
VP.SE.//CRISVS.SPRACK.FROVWE.
WOR.SINT.DINE/AKLEGERS.
HEFT. DI. NEMANT. VOERDEOMET.
SE.SPRACK.HER/NEMANT.
SO.VERDOENE.ICK.DI.OCK.NICHT.
GA.HE(N).SV(N)DIGE.NICHT.MER."

Äöversetten

Meester, disse Fru
is gräpen bi frischket Daun,
bi dei Ehebräkerei. Moses hätt
us in't Gesett baoen, sükke
tau steinigen. Wat seggs Du?
Woll mag dei, dei aohne Sünde
is, schmieten den eiersten Stein.
up ehr. Christus sprök, Frau,
wor sünd diene Anklaogers?
Hätt di nüms verdammet?
Sei sprök: Herr, nüms.
So verdamme ick di uck nich.
Gaoh hen, sündige nich mehr.


Südollnborger Platt: Ludgerd Lüske

Montierte Biller:
Bild Christus un dei Ehebräkerschke, 1535, 2011 restaureiert,
Maoler Hans Kemmer (ca. 1495 - 1561)

24.2.2013


na baven