Dat kannst mi glööven!
Ik bünn wichtig

vun Pastor Alexander Rolfes


To'n Anhören hier klicken:


Lesen deit Alexander Rolfes.


Wat fang ick mit mien Läven an? Disse Froage is kloar un verständlick un doch so schwoar tau beantworten. Herr Wohllieb in dei Geschichte "Herr Wohllieb töv up ein Teiken" van Susanne Niemeyer heff sück dacht, dat Gott för sücke Froagen woll drocke eine Antwort paroat harr. Man, dei schwigg... Worüm? Heff hei 't drocke, is hei överlastet?

"Dummet Tüch", schüllt sück Herr Wohllieb. "Överlastet! Dei Allmächtige!" Hei dachte noch eis einen Moment noah un upmoal verstünd hei. Dat kunn ja man bloß einen Grund dorför gäwen, worüm Gott schwiegen dö: Hei dachte noah! Gott, dei Allmächtige wull för üm, Bernd Wohllieb, dei besste Antwort finnen!


Denkt Gott so na...? Foto Katja Renfert

Un dei Gedanke was so gewaltig, dat he glieks weer Klöör in 't Gesicht kreeg. Sien Harte schlög flüsk, bit ton Hals. Schull hei, Bernd Wohllieb, denn wücklich so wichtig wäsen? Dat kunn ja bold nich angoahn! Hei kämmde sück noch einmoal dei Hoare un mennde, dat was nu woll Tied, dat he sik einen Schlips ümmebinnen kunnde. Dann mök hei einen Spaziergang un sä aale Noabars un Lüüe, de üm intomeute kömen, fröndlick gauden Dag: Up kienen Fall wull hei — wo hei doch so ein wichtigen Mensk was — de Lüüe glöwen laoten, üm rägende dat inne Näsen!


...orrer so? Bild Wilhelm Busch

Wat dor mit usen Herrn Wohllieb passeiert — dat is doch heller interessant, of nich? Wenn ik över einen Mensken, över einen Frönd, naohdenke, — dann is mi disse Mensk nich egoal! Un ümmedraihet is dat jüst so: Nich immer schaffe ick dat, aale Mensken, dei mi wat bedüürt, in 't Ooge to hebben. Dor is wisse dei ein off ännere all moal tau kotte koamen. Man wo schön is dat bi dat token Wedderseihen, wenn dat dann nich grummelich tüsken einen steiht! Un dann hett dat woll all moal: "Ich hebb immer moal weer an di dacht un mi fröggt, wo di dat woll geiht!"
Jao, dat stimmt: Uck wenn ick nich jeden Dach wat van üm hör, so weit ik doch, in dei Gedanken van väle Fröönde koam ick vör.

Dat to wäten deit gaud! Dat mennt: ik bünn wichtig!


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


10.2.2017


na baven