Dat kannst mi glööven!
Gott un sien Naomen

vun Alexander Rolfes


To'n Anhören hier klicken:
Lesen deit Alexander Rolfes.


"Du schösst den Herrn, dienen Gott, sienen Namen bloß in hillige Saoken bruuken." — Mit dissen Wiespaohl in de Riege van de taihn Gebote hebb ik lange nicks anfangen kunnt.
Verstaohn hebb ik dat nich. Wat schull dor Leipes an wäsen, wenn ik dat eis maol seggen dö?! — Väle Johre löter hebb ik erst begräpen, wat för 'n Sinn dit Gebot heff.

"Du schösst den Herrn, dienen Gott, sienen Namen bloß in hillige Saoken bruuken!"
Dat gellt dann, wenn Gott sienen Naomen för Menschkenwark herhollen mott.

Unner Gott sienen Naomen, mit Gott för Volk un Vaoderland, is in use Welt all väle Unrecht anrichtet worn. Un dat wisse nich in Gotts Sinn. Gotts Naomen, Gotts Woort will Leven geven, nich Dood un Unrecht. Wecker in Gotts Naomen Menschken ümme ehr Leven bringen deit, de vergeiht sik an Gott un sien Wort.
Gotts Naomen, Gotts Wort will Leven bringen. — Wat bedüüd dat? In Anfang van 't Evangelium van Johannes steiht schreven:

"To allererst was dat Wort, un dat Wort was bi Gott, un Gott was dat Wort. Aals is dör dit Wort worn, aohne dit Wort is nich ein Deil worn, wat worn is. In üm har aal dat Leven sien Grund un Bestand, un dat Leven was dat Licht för de Menschken. Un dat Licht schinnt in Düüstern."

Wecker in Gott sienen Naomen, mit Gott sien Wort up Menschken togeiht, de kann mithelpen, dat Gotts Wort Lecht in de düüster Welt bringen deit. Un lecht weert dat dann, wenn wi den annern un aal dat, wat üm fählen deit, in 't Ooge hebbt, wenn wi för Recht un Gerechtigkeit instaoht. Dat geiht nich üm eigen Vördeile, nich dorümme, annere unnertoduuken.

Wenn wi so Gotts Woort in usen Alldag bruuken daut, dann holl wi us an dat, wat de tweide Wiespaohl dor seggen deit: "Du schösst den Herrn, dienen Gott sienen Naomen bloß in hillige Saoken bruuken!"



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


1.7.2018


na baven