Dat kannst mi glööven!
Ein Träe naoh vörne — un dann...

vun Alexander Rolfes


To'n Anhören hier klicken:
Lesen deit Alexander Rolfes.


Eigentlick heet hei ja heil anners. Man wiel dat he de Straoten kehren deit, wedd hei bloß Beppo Straotenfäger neumet. Beppo is eine von de Hauptpersonen in dat Bauk "Momo" von den Schriever Michael Ende.

Dor is anns nicks Besünneres an Beppo, bloß dat de Lüüe üm för ein Besünnern holt. Wecke Lüüe meint uk, dat he se nich aale heff. He lustert de Lüüe to. Schnackt bloß dann, wenn he wat to seggen heff. Un dat kann duurn. Dat könnt väle Lüüe nich uthollen. Bloß eine kann so lange teuwen: Momo. Un se heff uk begräpen, worümme Beppo sik mit Antworden up Fraogen van de Lüüe so väl Tied lätt. Dor weert to minne tolustert un naohdacht is sien Meinen. Dat bring faoken bloß Striet in de Welt.

Wenn Momo un Beppo sick unnerhollt, dann nähmet sei sick Tied. Lustert to. Teuwet eierst mit eigen Raotschläge un Antwoorten. Aals bruukt sien Tied, dat heff Momo von üm lernt. So kummt gaut vöran un find uptlessde sienen eigen Weg.

"Mit dat Straotenkehren is dat so", vertellt Beppo: "Wenn man so naoh vörne kieken deit un de langen schmärigen Straoten vör sück liggen süht, dann mennt man, dat schaffet man nie nich. Un dann fang man an, aale man dröcker tau fägen. Man jedsmaol, wenn 'm hochkick un de Straoten noch vör sick süht, mennt man: Dat weert nicks minner. Un man is bange, dat man nie nich fardig weert. Man fang an sik noch mehr to ielen: drock un dröcker. Uptlessde krigg man dann kiene Luft mehr, kann nich mehr. Un de schmärigen Straoten ligg noch vör einen."

So wedd dat nicks, heff Beppo Momo eis maol vertellt. Dat mott man heil anners maoken: Ein Träe naoh vörne, deip Luft haolen un dann ein Strich mit 'n Bössen trecken. Un dann aale man so wieder. Ein'n Träe naoh vörne, deip Luft haolen, ein 'n Strich mit 'n Bössen trecken.

Wecker so siene Straoten geiht, de markt up'n Enn', dat hei so — ein'n Träe naoh vörne, deip Luft haolen un ein 'n Strich mit 'n Bössen trecken — dat hei so de heile Straoten schier krägen häff.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


8.7.2018


na baven