Dat kannst mi glööven!
Vincent van Gogh: Steerns an 'n Heven över de Rhône

vun Heinrich Siefer


To'n Anhören hier klicken:
Lesen deit Heinrich Siefer.


"Een Heven vull mit Steerns, dat was 't, wat ik eegens noch eis woll maol maolen möchd", schriff Vincent van Gogh an sienen Brauer Theo. In Arles, wor he över good een Johr levet heff un wor he de meisten van siene Biller maolt heff, maokt he sik uk forts an 't Wark: maolt dat "Straotencafé bi Nacht in Arles" un den "Heven vull Steerns över de Rhone".

Disse Biller düükert uk in den Film "Loving Vincent — Vincent vull van Leevde" up. Een Film, maokt bloß ut Biller van Vincent van Gogh. Disse Daoge hebb ik dor all een poor van hier vörstellt. Een Beld, wat mi besünners tosegg, is dat Bild "Heven vull van Steerns över de Rhone". Et röögt mi an. Dor möchd' man vör staohnblieven un kieken, kieken, bloß kieken. Sik mitnehmen laoten up en Reis deep nao binnen hen.

Jo, dor möchd' man hen. Dor an 'n Strand van de Rhone möchd' man staohn un up de Stadt Arles kieken. Lechter spägelt sik in 't Waoter. Sametblaw doröver de Heven. Steerns tinkelt un blinkstert, so as wörn se lüttke Laterns, de disse Nacht to en besünner Nacht weern laotet. De Lechter van de Stadt spägelt sik in 't blawe Waoter. En Bild, maolt bi Nacht — un doch lüchtet un glömmt et, as et dööner nich kann. Legg sik över aals as een Kleed, wat Schuul giv, still weern lätt. Kien Düüster, wat bange maoket. An'n Strand geiht en Poor. Dicht binanner. Schients verleevd. Wat de Heven vertellt, spört se wisse binnen sik: Warmte, Schuul, Totroon.

Vincent van Gogh harr dat mit de Karken un mit Gott nich so. In sien Tied as Pastor inne Borinage, en Gegend dicht bi de Stadt Mons in Belgien, was he sienen Gloven verlüstig gaohn. Man dit Bild schinnt as en Toflucht. Vertellt van sien Lengen nao Leevde, sik borgen un draogen wäten. Binnen van üm was dat Lengen nao dat, wat Totroon geven deit, Haopen lätt, woll noch lebennig.

Steerns an 'n Heven wieset den Weg. In de Seefohrt geiht nicks aohn de Steerns. Steerns bi Nacht an 'n Heven laotet us andächtig, still weern. Laotet us aohnen, dat dor noch veel mehr is as dat, wat wi mit use Oogen seihn könnt.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


10.6.2018


na baven