Dat kannst mi glööven!
Van 't Glück

vun Heinrich Siefer


To'n Anhören hier klicken:
Lesen deit Heinrich Siefer.


"Glücksegens Neijohr!" — of "Ik wünsch een glückselig Neijohr!" — Dat hört wi disse Daage in Januarmaand woll noch maal wat fökener. Glück — Segen — wat mennt dat? Wisse, wi aale wünsket us dat Glück. Man wor hang dat van of?

Stellt jau eis maal een Mensken vör, de bi een Experiment van de Weetenskup mitmaakt. Disse Mensk ligg kommodig up 't Sofa un schlöpp selig un deep. Man heff üm een Medikament geven, wat üm glückelk maakt. Un sien Gesicht schinnt uk vull van Smüüstern un Freeden. De Doktors, de dat Experiment leitet, meent, dat disse Mensk de token taihn Johr — un wenn he will uk noch länger — so glückelk leven kann. Un schull dat nich mehr mögelk wesen, dat Experiment to verlängern, kann he forts uk mit een besünner Middel glückelk starven.
Wat meent Se? Wüdden Se maal gern bi so een Experiment mitmaaken, wenn de Doktors ehr dat andregen wörn? Ik nich.


Dat lütte Glücksswien kiekt ok al ganz skeptisch!

Glück is för mi mehr as in een Tour dör een Medikament dat Glück bloß to dröömen. Glück leven un beleven, spören un föhlen, — dat hört för mi tosaame. Dat ik leve, dat ik bün, verdank ik mien Öllern. Un dat ik weet, dat mi een leev heff, dat verdank ik mien Froo, miene Kinner, anner Lüüe, de mi dat beleven, spöören laatet.
All dat kann ik mi nich koopen. Dat krieg ik schenket. Eenfach so.

Willt wi weeten, wor us dat Glück intomööt kummp, dann mööt wi manges bloß maal wat genawe henkieken: Glück is eis gor nich maal so selten, kanns finnen, an veele Stä'n. Glück, dat is jede neie Morgen, Glück is, wenn riewe Bloomen blaiht. Glück is de Hand van een Frönd, un manges uk een Besöök. Glück is, wenn mi all fröh an 'n Morgen een tolacht. Is dat goode Woort, wor 't jüst nödig deit.

Üm Glück to beleven, hört för mi dor aaltied anner Mensken mit d'rto: Familge, Frönde, Nahbers. Un manges is 't Glück uk dat Smüüstern in 'n Gesicht van een Frömdern — villicht glieks buten up de Straaten.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


28.4.2019


na baven