Dat kannst mi glööven!
König up'n Esel?

vun Elisabeth Tobaben

To'n Anhören hier klicken:

Lesen deit Elisabeth Tobaben.

De halve Hamborger Rathuusmarkt is afsparrt. Överall staht so Opstellgitter rüm, root un witt anstreken, un ümto wimmelt dat van Polizisten. Allens is torecht maakt för en Staatsbesöök . "Well kummt denn hier?", fraggt en junge Deern, un een fründliche Polizistin antert: "Wi töövt op en König ut en afrikaanisch Land, he is all ünnerwegens un mutt glieks hier wesen." Un nu koomt ok al de "witten Müüs" üm de Eck un de Wagen mit den hogen Besöök.

So kennt wi dat: Königinnen un Könige un ok uns demokratisch wählt Präsidenten un anner Prominente mööt schützt warden un bewacht. Un an de Straat staht de Lüüd, um jüm to begröten, roopt jüm villicht wat to, un die Kinner hevt bunte Papierfahntjes in de Hannen.

Motorradeskorte. Foto Ikar Us/wikimedia commons

Ik hev mi al jümmer wunnert, dat Jesus in de Bibel faken utgerekend as König beschreben ward. Eegentlich is he doch ganz anners! Wenn wi tokamen Sünndag eersten Advent fiert, denn höört wi wedder de Geschicht, wo he na Jerusalem kummt. Op en Esel ritt he in de Stadt rin, un dat is jo nu jüst nich so bannig königlich. En König üm de Tied stell ik mi jümmer op en staatschet Peer vör, villicht noch op en Kamel. Liekers hefft de Lüüd Jesus tojubelt, jüm ehr Kleder op den Weg smeten as "roden Teppich" un Twegen von de Palmen, un "Hosianna" ropen hebbt se ok.

Dat hört sik jo allens een beten verdreit an. Wat bedütt dat mit disse Esel? För mi heet dat, dat Jesus dat nich op Macht ankummt. He will dicht bi de Minschen wesen un ehr Gott sien Leevde wiesen un sien Freden brengen. Wo würr dat woll utsehn, wenn Jesus vandaag nah Hamburg keem?

Bi us up plattpartu.de finnt man nu utsöchte Bidräge van disse Radiosendung.