Dat kannst mi glööven!
Bi 'n Doktor

vun Pfarrer Heiner Zumdohme, Damme


To'n Anhören hier klicken:


Lesen deit Heiner Zumdohme.


Bi ähre Hüftoperation wör aals gaut verloopen, vertellde mi miene Naohberschke, as ik ähr in't Krankenhus besöchde. Se meende, dat de Doktors wüklich beste Arbeit maoket harn. Aower dann mennde se doch een bäten trurig, dat se sik een bittken dumm vörköm, as se de Doktors frög, wat daor aals up se tauköm. Statt up ähre Bangte intaugaohn, löt de Doktor ähr een Papier ünnerschriewen un vertellde ähr wat van Medizin, waor se nix van verstaohn har.

Daoran mössde ik denken, as ik lessdens inne Zeitung lees, dat Medizinstudenten taukünftig uk eenen Sozialtest in ähr Studium maoken schölt. Un bloß wekke dän bestaiht, schull uk as Doktor taulaoten wärn. Man mennde, dat jüs dat Soziaole in't Medizinstudium woll tau kotte kaömn.

Natürlik will ik taueierste, dat mien Doktor eene richtige Diagnose mök un mi eene richtige Therapie vörschlaogen dait, de mi uk helpt. Wat helpt mi de fründlickste Chirurg, wenn he nich richtig operieren kann un dän Blinddarm mit de Näwenniere verwesseln dait. Man üm richtig gesund tau wärn, is Fachwäten manges nich nauch. Jüst in Läwenkrisen un Bangte üm dien Läwen is 't nödig, dat di eener neehge is, di bisteiht, di straoket. Dat is meist jüst so wichtig as Apparaote, Medikamente un Operationen. Een gaud Woort kann di de Bangte nähmen un du fangs wär neei an tau haopen.

As ik lüttket wör un mi af un tau maol heller fallen oder annere Piene har, daor löp ik uk nich fortsen naoh dänn Doktor hän, taueierste meestiet naoh use Mamm'. Un wat mök de? De nöm mi uppen Schoot un pussede twee of dreemaol, un wänn dat uk nich hölp, füng se mit mi an't singen. Un aohne dat ik irgendeene Medizin nöhm, wör dat meistiet drocke wär bäter.

Waordör? Dör ähre Leiwde, ähre Neehgde! Use Mauder wör een heller gauen Doktor.

Ik glöwe, wekke de Lüe helpen will, de maot de Menschken verstaohn willn. Doktor wän is kien technischen, nee, mi dücht ehrder een ethischen Beruf. Up disse Aort un Wiese käönt wi aale gaue Doktors wän. Dor bruuk wi nich eis för studeern. Bäten Tiet, dänn anneren tautolustern un üm af un tau maol wat Gauet säggen. Dat helpt gesund tau wärn, un du brukst uk kiene Bange hebben, dat dat leipe Näbenwirkungen heff.


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


4.12.2016


na baven