Dat kannst mi glööven!
Fautball is use Läwen

vun Heiner Zumdohme


To'n Anhören hier klicken:
Lesen deit Heiner Zumdohme.


Fautball is use Läwen, so hedd dat in een Schlaoger. Dat dröpp för masse Lüe in de tauken veer Wäken tau. Denn tauken Dönnerdag iss et so laote. De Fautball-Weltmeisterschaft gaiht los. De Medien, dat ganze Land, jao baolde de ganze Welt schnackt van Fautball.

Laot us maol kott öwer de "mojeste Näbensaoke vanne Welt", denn Fautball, naohsinnen. Fautball is use Läwen! Is dat so, giv dat 'n Tausaomenhang tüsken Läwen un Fautball? Ik meen dat woll! Denn manges is mien Läwen as een Fautballspill. Ik loope un loope, man ik kriech den Ball nich tau packen. Manges feuhl ik mi gaut in Form, man ik scheet doch aale man daorgägen un tröffe dat Tor eenfach nich. Ik bün topfit, man ik sitt bloß up de Ersatzbank.

Manges is mien Läwen as een Fautballspill. Ik laot mi henrieten, wat Leipes to daun oder dat Gaue tau laoten. Un dann kriege ik de roe Kaorten. Manges feuhl ik mi as een Ball. Man jaogt mi, man trärt mi, as wenn ik bloß wat wert bün, wenn ik in't Tor lanne. Manges stell ik mi in 't Abseits. Laot aale achter mi un loop loss, wat dat Tüüg hollt, egaol, off de annere mitkummp, de annere is mi jüsgliek, jüs egaol of dor wat verboorn is, Hauptsaoke, ik bün vörne mit dorbi. Manges is dat Spälfeld van mien Läwen dörnanner, aals is krüüz un quer, dat Tauhopespälen tüschken mi un miene Mitmenschen löpp nich, dor is wat fuul un eegentlik mössde de Schiedsrichter drocke in siene Piepen blaosen un Elfmeter flaiten.

Jüst dann wärt dat Tiet, dat ik maol ne Halftiet maoke. Tau Ruhe kaome, eene Pause inlegge un maol wär up dat kieke, wat wichtig un nödig is in mien Läwen.

So 'ne Halftiet-Pause is eene groote Gelägenheit, de ik nich verstrieken laoten un verspälen schullde. Se is dortau dor, up dat tau lustern, wat mien Teamchef van mien Läwensspill — Gott — mi vertelln will, dormit ik in mien Läwen an'n Ball bliewe un nich den Anschluss un mien Läwensziel, dat Tor van mien Läwen ut'e Oogen verleese.

Fautball is use Läwen. Ik glöwe, dat dröp tau un lett sik gaut verglieken. Dat Fautballspill kann een Spägelbild för use Läwen wäsen. Villichte kiekt wi in de nächsten veer Wäken van der Fautballweltmeisterschaft uk af un tau use Läwensspill nee an.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


15.7.2018


na baven