Dat kannst mi glööven!
Farwe wiesen

vun Heiner Zumdohme


To'n Anhören hier klicken:
Lesen deit Heiner Zumdohme.


Van Daoge is et nu so laote. Veer Wäken Spektaokel Fautballweltmeisterschaft: Tau Huse, tauhope up de Straoten un Plakens bi't "public viewing". Wat mi nu all heller Pläseir maokt, sind aal de Fraulü un Mannslü, de sik as Fans van use düütsche Nationalmannschaft een Schaol in use Nationalfarwen ümme daut oder een Haut upp'n Kopp sett. Masse Lüe maolt sik sogaor ähr Gesicht in Schwatt, Rot un Guld an. Wunnerbaor süht dat ut.

Ik gäf dat uk woll tau: Bi de Spille van de düütsche Nationalmannschaft dau ik uk mien Düütschlandschaol ümme. Un so'n lüttken schwatt-rot-guldenen Striepen Farwe schmeer ik mi meestiet uk in mien Gesicht. Dat mök mi aower nix ut. Denn ik bin dor faste van öwertügt: Aale, de wi dor staoht, haope wi, dat use Nationalmannschaft dat Spill winnen dait. Dat maokt us eenig. In de tauken veer Wäken staoht wi tau use Mannschaft. Wi gäwt ähr use Gesicht, wi bekennt Farwe, wieset Gesicht.


Ook uns Autos bekennt Farw!

An een Gesicht kaönnt wi masse affläsen un seihn. Uk wenn dat nich anschmeert is. Uk du häs een Gesicht un bekennst daordör Farwe, uk wenn dat nich anmaolt is. Wekken wiesest du dien waohret Gesicht? Wenner un waor giffs du di tau erkennen? För wekke Saoke wöddest du dien Gesicht hergäwen? Villichte sogaor bemaolen?

Dien Gesicht is een Spägel van diene Säle. Jao! Een Gesicht säch uk masse daor öwer ut, wat för een Mensch du büs! Öwerläg di gaut, wor du manges utkicks!

Häs du di uk all maol öwerläggt, dat Gott dien Gesicht bruukt? Du büs dat, de Gott een Gesicht giff up disse Ärn. Taun Bispill, wenner du anner Lüe helpen dais, wenner du annere Lüe, de villichte trurig sünd, ne lüttke Fraide möks oder Fräden maokst, wor Striet wör; oder wor du di för Lüe insetten daihst, dei sik van sülwens nich mehr helpen kaönnt! In alls, wat du Gaues daist un wor du fründlik utkicks, giffs du Gott dien Gesicht. Un hee brukt di, hee brukt dien Gesicht. Hee traut di Grootet tau, manges mehr, als du glöwst. Öwerlegge di dorümme gaut, waor du utkicks, un wies dien waohret Gesicht. Bekenn Farwe!



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


29.7.2018


na baven