Dat kannst mi glööven!
Rahn mössde scheeten

vun Heiner Zumdohme


To'n Anhören hier klicken:
Lesen deit Heiner Zumdohme.



In de tauken veer Wäken feiwert väle Lüüe weer mit use Fautballspälers bi de Fautballweltmeisterschaft mit. Haopet, dat se wiederkaomt ün winnet. So as domaols uk bi de Weltmeisterschaft van 1954. Einige van jau, de mi nu taulustert, möchd dat villichte mit belevet un mit de Spölers mitfeiwert hebben. Wecke hebbt villicht uk noch den Kommentar in 't Ohr, de up Platt villicht so klungen har:

"Noch sess Minuten in 't Wankdorf-Stadion in Bern. Kiener wanket. Et gütt in Ströhmen. Et is schwaor, man de Tokiekers, se holt 't nich ut — wo schullen se uk! Eine Fautballweltmeisterschaft is alle veier Johre, un wann süht man uk so 'n Endspill, so spannend, un nu Düütschland up 'n lünken Fläögel mit Schäfer, Schäfer spält den Ball Morlock tau, de Ungarn wehrt den Ball off, un Bozsik, immer weer Bozsik, de rechte Löper van de Ungarn an 'n Ball. Ditmaol heff hei den Ball verloren, kägen Schäfer, Schäfer flanket nao binnen — Koppball — offwehrt — van achten mössde nu Rahn scheiten — Rahn schütt! — Tooooor! Tooooor! Tooooor! Tooooor!"


Dat ole Wankdorf-Stadion direkt vör't Afrieten un Niegbu

Dör dissen Schuss van Helmut Rahn füllt domaols in 't Endspill bi dei WM 1954 dat Siegertor för Dütschland gägen Ungarn. Noch van Daoge bekannt as "Dat Wunner van Bern". Wat hebbt dei Lüe sick frait!

Ower, wat wör eeigentlik wän, wenn Rahn nich schaoten har? Wenn hei maol jüs kiene Lust hat har, villichte nich utschloapen wör. Wat uk ümmer. Dat Wunner van Bern har et nich gäwen.

Dat köm in dissen Oogenblick up dissen Späler an, dat hei up sien Platz stünd, doar woar hei jüst brukt wärt, denn Ball annöhm un schöt. Un hei heff schaoten un mök dat Tor. Hei is siene Verantwortung nich ut'n Wäge gaohn. Un ik glöve, dat gilt för us jüs so. Jedeine van us kann sienen Bidrag leisten för ein gauet Tauhopeläwen van dei Lüe in use Verwandschkup, in use Naoberschkup. Dat kump doarup an, dat wi doar sünd un waok sünd, nich schlaopet, dat wi dat daut, wat jüs daon wärn maot.

Villichte werd wi daordör nich tau Helden van Bern oder tau Lüe, van dei aaltiet schnackt werd, aower dör use Daun werd wi tau Helden van usen Olldag un tau Helden för Gott.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


5.8.2018


na baven