De Flegenpilz

Wat is en Flegenpilz? Is dat
en Pilz, de flegen kann?
De mit sien Hoot as Flünken flappt?
— Och nee, dor glööv nich an!

"In'n Woold, dor steiht en Mannken
so still un stumm
un hett vun roden Purpur
en Mantel um.
Segg, wat denkst du woll, wokeen
kann dat rode Mannken ween
dat dor steiht so ganz alleen
op bloots een Been?!"

Düsse schönen Verse dicht'
ein, den 'n nich kennen mutt.
Man bloots, den Pilz, den meen he nich!
He meen de Hagebutt!

Dat is nu aver Tüdelkraam.
De Hagebutten sünd
doch nich alleen, i wo!, se kaamt
mit dree, veer, fief, söss Frünn'!

 

De Flegenpilz, op anner Siet,
steiht wirklich meist alleen,
un mennigmaal deit he dat op
en teemlich langes Been!

Hier steiht ja een! Sien Kopp is root,
binah as en Tomaat!
Un he hett Pickeln op'n Hoot.
De döögt nich för'n Salaat!

Nee, för'n Salaat, da döögt he nix!
To'n Kieken is he good,
man 'keen em itt, de markt dat fix —
un dorna blifft he dood!

Ofschoonst de Pilze giftig sünd,
köönt se ok fründlich ween.
Kiek hier: As Moder mit ehr Kind
schuult hier de Groot den Kleen'.

Dat hett sien Grund. Denn kiek di üm:
Ok Flegenpilze sünd
nich ganz alleen! Denn üm ehr rüm
finnst faken vele Frünn'!

Se sünd Geswister, nich bloots Fründ.
Denn deep in'n Grund, dor liggt
en grotes Nett, dat se verbindt.
Un wenn en Pilz opstiggt,

denn höört he een Familie to,
en unsichtboorn Verband.
De ganzen Pilze geevt sik so
unsichtbor still de Hand.


Pilzfotos: Thomas Seemann
Text: Marlou Lessing
17.10.2017


na baven