Kira
Fröhjohr liggt in de Luft, aver hüüt
is de Nevel Keunig över de Eer. Wat kolt dat is! Ik treck den
Mantelkragen wat höhger, Huu mi früst wat
süht de Karkhoff trurig ut! Op de Graffsteden sünd al Blomen
plant, aver de Frost hett överall nochmaal lütte witte Iesnadeln
verdeelt.
De Karktorm reckt sik piel in den Nevel op, un baben is dat een Jiepen
un Quinkeleern in de Luft. Ik kiek un kiek, un denn weet ik dat mit'nmaal,
wat dat woll för Vagels sünd. Dohlen sünd dat, swattgriese
Dohlen, de in'n Pulk üm den Karktorm flegen. Ik krieg richtig
runde Ogen Dohlen Biller kaamt in mi hooch Biller
von ole Tieden.
Ik bün wedder en lütt Deern mit lange dicke Zöppen
un ik renn, as ik kann! De Zöpp flegen achter mi in'n Wind.
"Fru Engel! Fru Engel! Ik heff hier wat funnen!"
Dat letzt Huus in Dörp en Finster geiht op. Poor fründliche
Ogen kieken ut
"Wat is denn passeert, mien Deern! Du büst jo rein ut de
Tüüt!"
Ik wies ehr mien Hannen en lütt plusterigen Dunenball
en Vagel
"Kiek maal, Fru Engel de is woll krank de lütt
Keerl."
Un denn sünd wi in de Köök un Fru Engel bekiekt sik
den Vagel. Een Flünken hangt em lang rünner. "De is
kaputt kümm, holl em fast, den Krabauter"
geiht na buten un kümmt poor Minuten later mit Pappe un een langen
witten Striepen Linnen torüch. Een mustergüllig Bandaasch
gifft dat an't Enn.
Sogoor en Käfig hett Fru Engel noch funnen in Schuppen,
ganz in de Eck. De Vagel is woll noch beten bedripst, aver sünst
in Orrnung. Mann hett de nu en Döst! Dat gluckert man
blots so rünner in de Kehl, wat he dor ut de Ünnerdass opnehmen
deit. De blassblagen Ogen plieren opmarken in'e Welt.
"Kira!",
seggt Fru Engel, un dat heurt sik an, as dä se quinkeleern. "Kira!
Mien lütte Kira!"
Von nu an gah ik jeden Dag von de School ut hen un besöök
mien swatten Vagel.
Duuert nich lang, denn sitt he ok op mien Hannen un ik dröff
em fodern. Flegen heff ik em mitbröcht, Kävers un dicke
fette Wörms. Mann, wat he gierig fritt! Dat smeckt em best!
Un mitünner sitt he denn sogoor in miene Hand un makt satt un
tofreden de Ogen to.
Nu hett he al richtig lange Feddern un ok'n Steert. Wat scheun he
is!
En Morrn in de Pingstferien tüdelt Fru Engel de Bandaasch af.
Kira kiekt ehr verwunnert an, denn fangt se an, sik to putzen, aver
flegen nee, dat noch nich. Meddag gah ik mit ehr in Goorn,
aver ok hier sitt se blots op mien Schuller un wunnert sik, aver flegen
nee noch nich.
"Se will bi mi bleven!", tereleert mien Hart, "se will
gor nich weg!" Aver Fru Engel tuckt de Schullern: "Tööv
af, mien Deern, se is'n Vagel, de warrt ok flegen."
Kira blifft bi mi, freit sik över de Sünn, över dat
Gröön un över de scheune Welt.
Warm is dat buten un wi sitten in Goorn. Dor passeert dat. In'n Appelboom
dröben sitt en Vagel, wohrraftig 'ne Dohle. "Kja, kja Kira!",
röppt se. Kira kiekt ehr an as hypnoteseert.
"Kja-kja!", anter se. Un denn mit'n Maal breet se ehr Flünken
ut, fleeg na den Appelbom un maak sik mit ehrn Kamraden na den Woold
röver. Weg weer se.
Mann,
wat weer ik verbaast. De Mund weer mi open stahn bleven. Kira
wegflagen eenfach wegflagen.
Ik mark dat lang nich, wat de Tranen mi över dat Gesicht rünnerlepen.
"Ween man nich, dat is nu maal so, mien Deern. Se ist nu weg
is jo'n Vagel" Fru Engel strakel mi över de
Hoor.
Ik heff Kira in Goorn söcht, in Woold, op de Wisch nee
se weer nich dor. De Sünn güng ünner. Trurig
seet ik ünnern Appelboom un tööv. De Käfig stunn
op'n Disch lerrig.
Aver woso klick dat so komisch as wenn een de Käfigdöör
opmakt?
Ik kiek na baben, un wat schall ik seggen, dor weer mien Kira un
wull mi beseuken!
Mann, heff ik mi freit! Ik geev ehr poor Regenwörms ut dat Glas
op'n Disch, un se hett se gierig opfreten. Denn suus se wedder af.
So keem se nu all Avend in Goorn un haal sik wat för ehrn Lekkertähn.
Mien Kira weer nu en utwussen Vagel, richtig scheun säh se ut.
Un mit'n maal weer se wedder weg lange Tiet.
Een Dag, dat weer al dat twete Maal Harvst worrn, do keem se noch
maal, aver nu harr se ehrn Mann un veer halfwussen Kinner bi sik.
Oh, wat weer se stolt! All kregen se beten wat to snabbeleern!
Baben üm den Karktorm flegen de Dohlen. En groten Pulk! Ik heff
keen lange Zöpp mehr un de Vagels schreet as dull. Hier vör
mi in dat Graff liggt mien Süster, mien leve Süster. Elisabeth
steiht op den Steen. Kinnertiet wo lang is dat her
En Traan löppt mi över't Gesicht Kja-kja-kja-kja
ri ri kja kira kira!
Text: Gertrud Everding
Biller: Kensise Anders
De Biller kannst per Klick vergröttern!
18.8.2013
|