Pony-Hopp

vun Hanne Hinz

As ick noch ein lütt Dierning wier,
ji koent mi grateliern,
dor schenkte mi mien leif Papa
ein Malbauk för sien Diern.

Ick füng gliek an tau malen an
mit Farwen kakelbunt.
Den lilla Klacks, den kreeg de Katt
un gräun de säute Hund.

Alle Tiere finn' ick schön,
all' Dierten up de Welt.
Mien leifstet Diert säuk ick mi ut,
wiel mi dat so geföllt.
Grotvadding säd: "Dat ward noch wat,
ick heff all ein bestellt,
dat trippelt, trappelt, möckt Hopp Hopp,
un hüppt all lustig in'n Galopp.
Is krägel, disse Schieter,
un wiest ok all sien Bieter." —
Mien Pony will ick priesen,
ick kann jug hüüt ein wiesen.

As ick denn nah de Schaul hengüng,
künn ick kein'n Klauk nich finn'.
Ick dachte blot an Pony-Hopp
un hölt't nich ut dor binn'.
Ick drömte nich von Mathe, nee,
ick swöögte in'n Galopp.
Bautz weckte mi de Lihrer up,
hei reet an mien'n Zopp.

Mien Pony heff ick ja so leif,
dat will ick hier vermell'n,
dat höllt tau mi, un ick glöw',
oft willt't mi wat vertell'n.
Na klor, wi rieden hüüt noch ut,
wiel uns dat so geföllt.
Mien Pony is mien beste Fründ,
dat Leifste up de Welt.

Alle Tiere finn' ick schön,
all' Dierten up de Welt.
Mien leifstet Diert säuk ick mi ut,
wiel mi dat so geföllt.
Wat Opa säd, dat is nu wat,
un wat hei secht, dat höllt.
Dat trippelt, trappelt, möckt Hopp Hopp,
un hüppt all lustig in'n Galopp.
Is krägel, disse Schieter,
un wiest ok all sien Bieter. —
Mien Pony will ick priesen,
ick kann't nu ümmer wiesen.