So schall St. Andreas utseihn hebben. Seker is dat aver nich.

De Pukkenvertellsel sünd keen Heidenkraam. De Schlutuper un Gothmunder Fischers un Fischhändlers stellten sik ünner den Schutz vun den Hilligen Andreas. Se buuten em 1436 en Kark.

Wenn een genau henkeek, fünn een an manch en Fischerhuus en Uhlenlock. Villicht weeren dor ok Pukken? – Dat weer up alle Fäll en gaude Tiet för Fischverarbeiden. 1907 geev dat 24 Bedrieve, 1929 40 Warke. Hawesta geev dat vun 1909 bit 2009.

Fischrökerie

Dat weeren gaude Johren bi de Fischrökerer un Fischbrader west. As noch de Konservendoos erfunnen weer, kunnen se gor nich so veel Fisch rankriegen, as de Fruuns in de Dosen packten un de Deckel updreihten. Jümmer niege Rezepte wöörn utprobeert. Jümmer miehr Verdrääg müßten för Fischanlevern slåten warden.

Bi Villeroy un Boch harrn veele Fruuns Arbeid ut Lübeck, se „weeren in de Platten“. Nu brukte ok Carl jümmer miehr Hülpskräfft. De kemen ut Meckelborg. Schlutup harr den Nadeil, dat dat buten vör Lübeck an de Traav liggt. Allens aver ging bestens ut: Na Slutup föhrte een Elektrische, de so utseihn hett as düsse.

Carl müßt gor nich veel warven: Hei weer as en gauden Brötchengever bekannt. Veele Fruun fünnen bi ehm Arbeid. Se „güngen in de Fisch“.

Vun disse Fruuns warden in Slutup vele Geschichten vertellt. In de Schaulen schallen de Rektoren in Konferenzen seggt hebben: Un wat seggt „de Fruuns in de Fisch“ dortau? Un dat wöör iernst un wichtig nahmen.

In de Elektrischen, de na Slutup föhrten, röök een, wohen un woher de Reise güng. Dat röök beten scharp na Fisch. Un wenn sik een beklagte, denn drängelten de Fruuns em an de neegst Holl-Statschoon ut de Elektrische rut. Fasthollen hülp nich. Dat harr sik ok bald rümspraken.

So vergüngen de Johr. Corl un Anna wöörn old. Nakamen föhrten de jümmer grötter worrne Fischverarbeitung. Överall weeren de Produkte ut Slutup to köpen: Hawesta.

Nu bün ik 17 Johr up Olendeil un kaam nich miehr so rüm. Dat Bladd is mien Verbinnen mit de Welt. Und wat lees ick dor 2009?

16.10.2009 „Lübecker Nachrichten“

Rügen Fisch kauft den Lübecker Konkurrenten Hawesta
Die Rügen Fisch AG in Sassnitz auf Rügen hat den traditionsreichen Fischkonserven-Hersteller Hawesta in Lübeck mit 200 Mitarbeitern übernommen. Wie die "Lübecker Nachrichten" am Mittwoch in ihrer Online-Ausgabe berichteten, hat Hawesta-Gesellschafter Peter Westphal-Langloh seine Anteile an dem 100 Jahre alten Familienunternehmen an den zweitgrößten deutschen Fischkonserven-Hersteller verkauft.

Rügen Fisch hett alle „Fruuns in de Schlutuper Fisch“ behollen. Dat wöörn noch miehr instellt. De Produkte, so verspröök Rügen Fisch, wöörn wieder mit den Naam Hawesta up den Markt bröcht.

Dat müßt ik kuntrulleren. Inge hett in en Inkoopsmarkt in Stockelsdörp dat Fischrebett ünnersöcht. Denn hett se mi in de Stüttkoor mitnahmen. Wi fünnen:

"Hawesta" gifft dat noch.

Un wat mit Mareikes Puk nu woll weer? Hei harr över 100 Johr Jan und Mareikes Nakamen bistahn. Na Jan sien Klabautermann dörfte ok de Puk an de Hevensdöör nafragen, wat hei rinkamen kunn.

Dat weer en wunnerbore Weg för Mareikes Puk.

De Heven süng: Halleluja!

De Puk keem in’n Heven.

Un se süngen em de teihn Wiespahls vör:

De eerste Wiespahl:
Ik bün dien Gott. Ik heff di ruuthaalt ut den Sklavendeenst.
Ik heff di wat tau seggen. Dat gifft nix, wat wichtiger is.

De tweete Wiespahl:
Du schast mienen Naam’ nich in'n Mund nehm',
as wenn dat gor nix weer.
Dor denk an: Wenn du mi roopen deist, denn hör ik di.

De drütte Wiespahl:
Jede Fierdag is en Dag,
wo ik bi di tau Besöök kaamen will.
Du schast denn nich so doon, as wenn du keen Tied för mi harrst.

De veerte Wiespahl:
Dien Vadder blifft dien Vadder un dien Modder dien Modder
dien levenlang. Sei bruukt dien Leev —
dor denk an, dat ok du mal oold warden deist.

De föffte Wiespahl:
Du schast nie op annere Minschen rümtrampeln,
as wenn se Schiet weern.
All hemm sei ehr Leven vun mi, un wer em dat
wechnehmen will, kriggt dat mit mi to daun.

De sösste Wiespahl:
Wenn twei Minschen tohoop hüürt,
schast du dar nich twischen kaamen.

De sövente Wiespahl:
Du schast den Minschen nix wegnehmen,
em nich övert Ohr haun un em nich uutpauern.
Sorg dor lever för, dat hei all'ns hett,
wat hei tau't Läven bruuken deit.

De achde Wiespahl:
Du schast nich leegen un bedreegen
un ok nich över anner Lüü snacken un sluudern.
Hölp ehr taurecht, anners holl dien Schnut.

De neegente Wiespahl:
Wat schmittst du dien Oog op dien Nahver sien Huus?
Dien Tauhuus is bi mi.

De teihnte Wiespahl:
Du schast nich tau dien Nahver röver schuulen,
wat dei all'ns hett. Dor vergittst du bi, wat ik för di daan heff.

Na Ernst Hansen

Un hier warrt de teihn Wiespahls vörleest:

Lesen deit Rudi Witzke.